×

छ महिनामा ५३ अर्बको धितोपत्र थपियो, २० अर्ब बराबरको पाइपलाइन

-नोटबजार संवाददाता।
काठमाण्डौं।
४फाल्गुन, २०७६, आईतवार / Feb 16, 2020 17:35:pm

चालु आर्थिक वर्षको पहिलो ६ महिनामा धितोपत्र बजारमा ५३ अर्ब बढीको धितोपत्र थपिएको छ ।

राष्ट्र बैंकका अनुसार साउनदेखि पुस महिनासम्ममा गरी साधारण शेयर (आईपीओ), बोनस, हकप्रद, डिबेन्चर र अन्य शेयर समेत गरी ५३ अर्ब १४ करोड बराबरको धितोपत्र थपिएको राष्ट्र बैंकले जनाएको छ ।

यसवधिमा १५ अर्ब ४६ करोड रुपैयाँ बराबरको ऋणपत्र, १० अर्ब ५६ करोड बराबरको साधारण शेयर,.१४ अर्ब ३३ करोड बराबरको बोनस शेयर थपिएको छ । 

यस्तै, ५ अर्ब ७५ करोड बराबरको म्युचअल फण्ड, २ अर्ब ५६ करोड बराबरको हकप्रद शेयर र ४ अर्ब ४७ करोड बराबरको अन्य गरी कुल ४३ अर्ब १४ करोड बराबरको धितोपत्र थप भएको राष्ट्र बैंकले जनाएको छ ।

राष्ट्र बैंकका अनुसरा पुस मसान्तसम्ममा नेपाल धितोपत्र बोर्डले १६ अर्ब ५० करोड बराबरको डिबेन्चर, २ अर्ब ४७ करोड बराबरको हकप्रद शेयर, १ अर्बको म्युचुअल फण्ड र ३४ करोडको साधारण शेयर गरी २० अर्ब ३१ करोड बराबरको धितोपत्र निष्काशन गर्न अनुमति दिएको छ ।

पुस मसान्तमा सूचीकृत ४ अर्ब ६२ करोड शेयर संख्याको चुक्ता मूल्य ४५२ अर्ब ५३ करोड रुपैयाँ रहेको राष्ट्र बैंकको तथ्याङ्कमा उल्लेख छ। सो अवधिसम्म नेप्सेमा सूचीकृत कम्पनीको संख्या २१२ पुगेको छ।

सूचीकृत कम्पनीमध्ये १४९ बैंक तथा वित्तीय संस्था र बीमा कम्पनी रहेका छन् भने ३२ जलविद्युत् कम्पनी, १९ उत्पादन र प्रशोधन उद्योग, ४र४ होटल तथा व्यापारिक संस्था र ४ अन्य समूहका रहेका छन्।

राष्ट्र बैंकका अनुसार मंसिर मसान्तसम्ममा सूचीकृत कम्पनीहरूमध्ये बैंक तथा वित्तीय संस्था र बीमा कम्पनीको धितोपत्र बजार पूँजीकरणको हिस्सा ७९.३ प्रतिशत रहेको छ। त्यसैगरी जलविद्युत कम्पनीको हिस्सा ६.३ प्रतिशत, उत्पादन र प्रशोधन उद्योगको हिस्सा ३.७ प्रतिशत, होटलको हिस्सा १.६ प्रतिशत, व्यापारिक संस्थाको हिस्सा ०.३ प्रतिशत तथा अन्य समूहका कम्पनीहरुको हिस्सा ८.८ प्रतिशत रहेको छ।



Share on:


Comments