राजश्व चुहावटमा लेखापरीक्षक मतियार बन्दै, राजश्व अनुसन्धानद्धारा साढे १७ करोड बिगो सहित मुद्धा दायर

✍️ नोटबजार संवाददाता ।
काठमाण्डौं ।
२६बैशाख, २०७९, सोमबार / May 09, 2022 17:01:pm

व्यवसायिक प्रतिष्ठानहरुमा आबद्ध लेखापरीक्षकहरु प्रतिष्ठानको गलत आर्थिक कृयाकलापमा मतियार बनेको भन्दै राजश्व अनुसन्धान विभागले उच्च अदालत पाटनमा मुद्धा दायर गरेको छ ।

विभागले मूल्य अभिवृद्धि कर तथा आयकर छली गरेको भन्दै काठमाण्डौंको अन्तरा इन्टरनेशनल र सोही फर्मका २ जना लेखापरीक्षक विरुद्ध उच्च अदालत पाटनमा मुद्धा दायर गरेको हो ।

विभागका अनुसार स्थायी लेखा नम्बर ३०१८११६१३ का सञ्चालक तथा लेखापरीक्षकहरु गणेशबहादुर केसी र श्याम सुन्दर यादवले राजश्व चुहावट गर्न जालसाँझी गरेको भन्दै मुद्धा दायर गरेको हो ।

अन्तरा इन्टरनेशनलले नक्कली तथा भुठा मूल्य अभिवृद्धि कर बिजक खरिद गरेर वित्तीय विबरण तथा आय विबरण तयार गरेर कर छली गरेको विभागले जनाएको छ । मूल्य अभिवृद्धि करतर्फ २ करोड ५० लाख ४५ हजार ३११ रुपैंया साथै आयकरतर्फ ६ करोड ३ लाख ३२ हजार २४३ रुपैंया गरी ८ करोड ५३ लाख ७७ हजार ५५४ रुपैंया राजश्व चुहावट गरेको विभागको ठहर छ । राजश्व चुहावट भएको बिगो रकम र शतप्रतिशत जरिवाना समेत गरी १७ करोड ७ लाख ५५ हजार १०८ रुपैंया मागदाबी गर्दै उच्च अदालतमा मुद्धा दायर गरिएको विभागले जनाएको छ ।

राजश्व चुहावट (अनुसन्धान तथा नियन्त्रण) ऐन २०५२ को पहिलो संशोधनमा गरिएको व्यवस्था अनुसार कैद सजाय समेत माग गर्दै विभागले मुद्धा दर्ता गरेको हो ।

📣  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।


Share on:


Comments