नेप्सेमा एकैदिन बन्यो पाँच नयाँ रेकर्ड

शेयर बजारमा आज नेप्से सूचकसँगै कारोबार रकम, कारोबार संख्या (पटक), अनलाईबाट कारोबार प्रतिशत र बजार पूँजीकरणमा समेत नयाँ रेकर्ड कायम भएको छ ।

शेयर बजार सूचक मापक नेप्सेले २०७३ साउन १२ गते बुधबार कायम भएको बिन्दु तोडेर ५३ महिनापछि १ हजार ८८१ दशमलव ४५ लाई तोडेर २०७७ मंसिर ११ गते बिहीबार १ हजार ८९३ दशमलव २४ बिन्दुमा कायम हुँदा अन्य तीन रेकर्ड पनि सँगसँगै कायम भएका छन् ।

आज नेप्से परिसूचक १८.४३ अंकले बढेर हालसम्मकै सर्वाधिक उचाई १ हजार ८९३ दशमलव २४ को विन्दूमा पुगेको हो ।

आज शेयर बजारमा ७ अर्ब ६१ करोड ३० लाख ३० हजार ९१ रुपैयाँको शेयर कारोबार भएको छ । यसभन्दा अघि २०७७ मंसिर ७ गते आइतबार ६ अर्ब ९० करोड रुपैयाँ बराबरको कारोबार भएको थियो ।

आज कारोबार संख्याको आधारमा पनि नयाँ रेकर्ड कायम भएको छ । आज एकैदिन ७० हजार ३ वटा काराबार भएको छ । यसभन्दा अघि २०७७ असोज ४ गते एकैदिन ६४ हजार ५१५ वटा कारोबार भएको थियो । त्यो कीर्तिमानलाई बिहीबारको कारोबार संख्याले तोडेको हो ।

यस्तै आज अनलाईबाट भएको शेयर कारोबारको प्रतिशत पनि हालसम्मकै उच्च भएको छ । आज २३ हजार ५० लगानीकर्ता सहभागि भएर भएको कारोबारमध्ये ८७.७५ प्रतिशत कारोबार अनलाइनमार्फत भएको हो ।यसअघि मंसिर ४ गते ३० हजार लगानीकर्ता सहभागी थिए दिन भएको कारोबारमध्ये ८६.२४ प्रतिशत कारोबार अनलाइनमार्फत भएको थियो ।

यसैगरी आज धितोपत्रको दोस्रो बजार पूँजीकरण पनि हालसम्मकै उच्च बनेको छ । आज बजार पूँजीकरण २५ खर्ब ३७ अर्ब ४४ करोड २२ लाख ८० हजार रुपैयाँ पुगेको छ । यसभन्दा अघि बुधबार मात्रै २५ खर्ब १३ अर्ब १५ करोड ८२ लाख ३० हजार रुपैयाँ रहेको थियो ।

कारोबार कित्ताका आधारमा भने आज नयाँ रेकर्ड बन्न सकेन आज १ करोड ७१ लाख ८८ हजार ९९ कित्ता शेयर कारोबारमा आएको छ । यसअघि मंसिर १० गते बुधबार कारोबार कित्ताका आधारमा सबैभन्दा धेरै १ करोड ८८ लाख ४६ हजार १८१ कित्ता कारोबार हुँदै नयाँ रेकर्ड कायम भएको थियो ।

बिहीबार कारोबारमा आएका बैंकिङ्ग, अन्य, म्युचुअल फण्ड, जलविद्युत, र उत्पादन बाहेक ७ उपसमुहका सूचक ऋणात्मक भएका छन् । कारोबारमा नेपाल पुनर्बीमा कम्पनीको सबैभन्दा धेरै ५८ करोड १३ लाख रुपैयाँको कारोबार भएको छ । नबिल बैंक, शिवम् सिमेन्ट, एनटिसी, नेपाल बैंक, प्रभु बैंक, हिमालयन डिष्टिलरी, नेपाल लाइफ, कुमारी बैंक र शिखर इन्सयोरेन्सको उच्च कारोबार भएको छ ।

आजको बजारमा एनएमबि माइक्रोफाइनान्स, पाँचथर पावर, हिमालयन उर्जा, र आँखुखोला हाइड्रोपावरको शेयरमूल्य ९ प्रतिशत धेरैले बढेको छ । नबिल बैंक, कुमारी बैंक, नेपाल बंगलादेश बैंक, चिलिमे हाइड्रोपावर, नेपाल रि इन्स्योरेन्स कम्पनी, र सिद्धार्थ बैंक शीर्ष शेयरमूल्य बढ्ने दश कम्पनीमा समेटिएका छन् ।

आज साल्ट ट्रेडिङ्गको शेयरमूल्य ६.१८ प्रतिशत अर्थात ४९४ रुपैयाँले घट्दा ७ हजार ५०६ मा झरेको छ । ङादी ग्रुप पावर, बोटलर्स नेपाल तराई, सांग्रिला डेभलपमेन्ट बैंकको ५ प्रतिशत धेरैले मूल्य घटेको छ ।  मल्टिपपर्स फाइनान्स, कर्णली डेभलपमेन्ट बैंक, रिडी हाइड्रोपावर, नेशनल माइक्रोफाइनान्स, नेशनल हाइड्रोपावर र समीट लघुवित्तको शेयरमा लगानी गरेका लगानीकर्ताले पनि गुमाएका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।