कोभिडले थलिएको अर्थतन्त्र लयमा फर्कदैँ, बैंकहरुमा कर्जाको माग बढ्यो

कोभिडका कारण थला परेको मुलकको अर्थतन्त्र पछिल्ला केहि महिना यता क्रमश चलायमान हुन थालेपछि बैंकहरुमा कर्जाको माग बढ्न थालेको छ । मंसिर महिना सुरु भएयता बैंकहरुमा कर्जाको माग ह्वात्तै बढेको छ भने बैंकहरुले समेत कर्जा विस्तारलाई जोड दिएका छन् ।

संचालनमा रहेका २७ वाणिज्य बैंकले मंसिर महिनाको चार सातामा अर्थात २६ गतेसम्म ४९ अर्ब रुपैयाँ कर्जा विस्तार गरेका छन ।

जबकी यो अवधिमा बैंकहरुमा ४६ अर्ब मात्र निक्षेप थपिएको छ । मंसिर महिनामा बैंकहरुको निक्षेप संकलन भन्दा कर्जा विस्तार ३ अर्ब बढीले बढेको छ ।

नेपाल बैंकर्स संघका अनुसार मंसिर २६ गतेसम्म वाणिज्य बैंकहरुले ३६ खर्ब ९४ अर्ब रुपैयाँ निक्षेप संकलन गरेका छन् । यसअवधिमा बैंकहरुले ३१ खर्ब १ अर्ब कर्जा विस्तार गरेका छन् ।

तिहारपछिको डेढ महिनामा बैंकहरुमा ७९ अर्ब रुपैयाँ निक्षेप थपिएको छ भने यस अवधिमा ७९ अर्ब रुपैयाँ नै कर्जा विस्तार भएको छ । चाडपर्व सकिएपछि बैंकहरुमा विस्तारै कर्जाको माग आउन थालेको देखिन्छ ।

यतिबेला बैंक तथा वित्तीय संस्थामा प्रशस्त तरलता रहेको र ब्याजदर समेत सस्तो भएपछि नयाँ व्यवसाय गर्नेहरुले लगानीका लागि उपयुक्त अवसरको रुपमा लिएकाले पनि बैंकहरुमा कर्जाको माग बढेको देखिन्छ । साथै राष्ट्र बैंकले कोभिड प्रभावितका लागि ल्याएका सहुलियत कार्यक्रमहरुले पनि बैंकहरुको कर्जा बढेको हो ।

कोरोना भाइरसको प्रभाव कम हुँदै गएपछि बैंकहरुमा कर्जाको माग आउन थालेको हो । पछिल्लो समय अर्थतन्त्र चलायमान बन्दै गएको छ । जनजिवन तथा व्यापार व्यवसाय पहिलेकै अवस्थामा फर्कर्ने चरणमा रहेकाले आर्थिक गतिविधि समेत बढेपछि बैंकहरुले कर्जा विस्तार गर्न थालेका छन ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।