नेप्सेको नाफा साढे ३३ करोड, सरकारले मात्रै साढे १४ करोड लाभांश पाउने

नेपाल स्टक एक्सचेन्ज (नेप्से) ले गत आर्थिक वर्षको नाफावाट शेयरधनीलाई २५ करोड बराबरको लाभांश बाँड्ने भएको छ । नेप्सेले १० करोड बराबरको बोनस र १५ करोड रुपैयाँ नगद लाभासं बाड्ने भएको हो ।

गत आर्थिक वर्ष ०७६।७७ मा नेप्सेले ३३ करोड ५० लाख रुपैयाँ नाफा गरेको थियो। जसमध्ये नेप्सेले चुक्तापूँजीको २० प्रतिशत बोनस र ३० प्रतिशत नगदगरी कुल ५० प्रतिशत अर्थात २५ करोड बराबरको लाभांश वितरण गर्नेछ ।

नेप्सेले वितरण गर्ने कुल २५ करोड लाभांशमध्ये सरकारले बोनस तथा नगद सहित १४ करोड ६६ लाख ५६ हजार १२५ रुपैयाँ बराबरको लाभांश पाउनेछ । जसमध्ये ५ करोड ८६ लाख ६२ हजार ४५० रुपैयाँ बराबरको बोनस र ८ करोड ७९ लाख ९३ हजार ६७५ रुपैयाँ नगद लाभांश लग्नेछ । नेप्सेमा सरकारको ५८.६६ प्रतिशत शेयर हिस्सा छ ।

सरकार सहित नेप्सेमा नेपाल राष्ट्र बैंक, राष्ट्रिय वाणिज्य बैंक, कर्मचारी, सञ्चय कोष, प्रभू बैंक, लक्ष्मी बैंक तथा पुराना धितोपत्र दलाल कम्पनीको पनि लगानी रहेको छ ।

नेपाल राष्ट्र बैंकले नेप्सेको गत आर्थिक वर्षको नाफाबाट १ करोड ४५ लाख ९९ हजार बराबरको बोनस र २ करोड १९ लाख रुपैयाँ नगद प्रतिफल पाउनेछ।नेप्सेमा राष्ट्र बैंकको १४.६० प्रतिशत हिस्सा छ । त्यसैगरी कर्मचारी सञ्चय कोषको १० प्रतिशत रहेको शेयर हिस्साका आधारमा एक करोड रुपैयाँ बराबरको बोनस र एक करोड ५० लाख नगद पाउनेछ ।

राष्ट्रिय वाणिज्य बैंकको ६.१४ प्रतिशत शेयर हिस्साका आधारमा ६१ लाख ३६ हजार बराबरको बोनस र ९२ लाख ४ हजार रुपैयाँ नगद, लक्ष्मी बैंक र प्रभू बैंकको ५ प्रतिशतका दरले स्वामित्व रहेको हुनाले दुबै संस्थाले ५० लाख बराबरको बोनस र ७५ लाख रपैयाँ नगद लाभांश पाउने भएका छन । त्यसैगरी धितोपत्र दलाल कम्पनीहरुको समेत ०.६ प्रतिशत शेयर स्वामित्व रहेको हुनाले ६ लाख बराबरको बोनस शेयर र ९ लाख नगद लाभांश पाउने भएका छन् ।

नेप्सेको सञ्चालक समितिले गरेको सो निर्णय आगामी साधारणसभाले पारित गरेपछि शेयरधनीले लाभांस पाउनेछन । नेप्सेले अगामी २९ गते साधारणसभा गर्ने भएको छ ।

साधारण सभाबाट सञ्चालक समितिले प्रस्ताव गरे अनुरुप चुक्ता पूँजी ५० करोडको २० प्रतिशतका दरले हुन आउने १० करोड बराबरको बोनस शेयर वितरणपछि नेप्सेको चुक्ता पूँजी ६० करोड रुपैयाँ पुग्नेछ।

• नेप्सेले ५० प्रतिशत लाभांश वितरण गर्ने, १५ करोड नगद बाँड्ने

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।