शिखरका सीईओ पाण्डेको नियुक्तीमा स्टे अर्डर जारी गर्न सर्वोच्चद्धारा अस्वीकार

सर्वोच्च अदालतले शिखर इन्स्योरेन्सका प्रमुख कार्यकारी अधिकृतमा दीप प्रकाश पाण्डेको नियुक्ति बदर गर्न माग गर्दै परेको रिट उपर स्टे अर्डर जारी गर्न अस्वीकार गरेको छ ।

पाण्डेको नियूक्ती रोक्न अन्तरिम आदेश माग गर्दै परेको निवेदन उपर सर्वोच्च अदालतका न्यायाधिश द्वय विश्वम्भरप्रसाद श्रेष्ठ र कुमार रेग्मीको संयुक्त इजलासले उक्त मुद्दामा अन्तरिम आदेश दिनु नपर्ने ठहर गरेको हो ।

यससँगै शिखर इन्स्योरेन्सका प्रमुख कार्यकारी अधिकृतमा दीप प्रकाश पाण्डेलाई सीईओका हैसियतले कामकाज गर्न/गराउन बाटो खुलेको छ । यद्यपी पाण्डेको मुद्दा विचाराधीन अवस्थामा रहेकाले मुद्दाको अन्तिम फैसला नहुन्जेलसम्मका लागि मुद्दा भने जारी नै रहनेछ ।

बीमा समितिले जारी गरेको संस्थागत सुशासन विरुद्ध गएर कम्पनीको सञ्चालक समितिले पाण्डेलाई सीईओ नियुक्त नियुक्ति गरेको र गलत तरिकाले आएको नियुक्तीको प्रस्ताव स्वीकृत गरेकाले बीमा समितिमाथि कारवाही गर्न माग गर्दै अधिवक्ता माधव गौतमले शिखर इन्स्योरेन्स कम्पनी र बीमा समितिलाई विपक्षी बनाएर गत कार्तिकमा सवोच्चमा रिट दायर गरेका थिए ।

रिटमा शिखर इन्स्योरेन्समा पाण्डे दुई पटक भन्दा बढी कार्यकाल सीईओ भइसकेकोले पुनः नियुक्त दिने बीमा समितिका अध्यक्ष चिरञ्जीवी चापागाईको निर्णय त्रुटीपूर्ण रहेको भन्दै खारेज गर्न माग दाबी गरिएको थियो ।

सञ्चालक समितिले गरेको नियुक्ती बीमा समितिको संस्थागत सुशासन निर्देशिका २०७५ बमोजिम योग्य भएको भन्दै समितिले गत असोजमा पाण्डेलाई पुनः सीईओ नियुक्तीका लागि अनुमति दिएको थियो ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।