मनकामना स्मार्ट लघुवित्तको आईपीओ लगानीकर्तालाई ‘हात्तिको मुखमा जिरा’

असार १७ गते बिहीबार अर्थात भोलि देखि सर्वसाधारणमा बिक्रीमा आउन लागेको मनकामना स्मार्ट लघुवित्तको प्राथमिक शेयर (आईपीओ) लगानीकर्ताहरुका लागि नेपाली उखान ‘हात्तिको मुखमा जिरा’ हुने देखिएको छ । प्राथमिक बजारमा उच्च आकर्षण बढेर उच्च आवेदन परिरहेको सन्दर्भमा बिहीबारदेखि बिक्रीमा आउने उक्त आईपीओमा सो उखान लागू हुने भएको हो ।

पछिल्लो समय जीवन विकास लघुवित्तको आईपीओमा साढे २० लाख ८७ हजार वटा बढी आवेदन परेको बिक्री प्रबन्धक एनएमबि क्यापिटलले जनाएको छ । यस आधारमा मनकामना स्मार्ट लघुवित्तले जारी गर्ने आईपीओ १०० जनामध्ये २ जनाले शेयर पाउन पनि मुस्किल हुने देखिएको छ ।

लघुवित्त कम्पनीले १ सय रुपैयाँ अंकित दरका कुल ३ करोड ८९ लाख रुपैयाँ बराबरको ३ लाख ८९ हजार कित्ता आईपीओ निष्काशन गरेको छ । जसमध्ये ६ हजार ५८ कित्ता कर्मचारीलाई, १९ हजार ४५० कित्ता सामूहिक लगानी कोषलाई सुरक्षित गरी बाँकी रहेको ३ लाख ६३ हजार ४९२ कित्ता सर्वसाधारणमा बिक्रीमा आउँदैछ ।

लघुवित्तको आईपीओ धितोपत्र निष्काशन तथा बाँडफाँड निर्देशिका अनुसार गोलाप्रथाबाट ३६ हजार ३४९ जनाले १० कित्ता बाँडफाँड हुनेछ । यसरी १० कित्ता बाँडफाँड गरी बाँकी रहेको २ कित्ता शेयर १० कित्ता शेयर पाउने आवेदकमध्ये २ जनाले १।१ कित्ता गरी ११ कित्ता पाउनेछन् ।

न्यून आवेदकका कारण एक सय जनामा २ जना आवेदकले शेयर पाउने र पछिल्लो समय बैंक तथा वित्तीय संस्थाले सि-आश्वा वापत निःशुल्क उपलब्ध गराइरहेको सेवामा समेत शुल्क लिन थालेको सन्दर्भमा  यस लघुवित्तको शेयर भर्नु भनेको बैंक तथा वित्तीय संस्थालाई सि आश्वा शुल्क बुझाउने मात्र जस्तो देखिएको छ ।

पछिल्लो समय डिम्याट खाता खोल्ने लगानीकर्ताको संख्या ३६ लाख ३१ हजार ५९८ पुगेको छ । जीवन विकास लघुवित्तको आइपीओ खुल्दा ३५ लाख ५७ हजार रहेको डिम्याट खाताको संख्या पछिल्लो निष्काशनको अवधिमा मात्रै ७५ हजारले बढेको हो । यस आधारमा पनि न्यून संख्यामा निष्काशनमा आउने आईपीओले लगानीकर्तालाई निराश मात्रै बनाउने अनुभवि लगानीकर्ताहरु बताउँछन् ।

रुपन्देहीमा रहेको मनकामना लघुवित्त वित्तीय संस्था र दाङ्गको स्मार्ट लघुवित्त वित्तीय संस्था एक आपसमा गाभिएर बनेको मनकामना स्मार्ट लघुवित्तको जारी पूँजी १२ करोड ११ लाख ५० हजार रुपैयाँ छ । लघुवित्तले जारी पूँजीको ३२.११ प्रतिशत आईपीओ निष्काशन गरेको हो ।

कम्पनीको आइपीओमा लगानीकर्ताहरुले अनलाईन मार्फत मेरो शेयरबाट आवेदन दिन सक्नेछन् । नेपाल धितोपत्र बोर्डबाट स्वीकृति प्राप्त गरेका सम्पूर्ण सि–आस्बा सदस्य बैंक तथा वित्तीय संस्थाहरु र तिनका तोकिएका शाखाहरुबाट पनि आवेदन दिन सकिनेछ ।

लघुवित्तको शेयर निष्काशन तथा बिक्री प्रबन्धक एनएमबी क्यापिटल रहेको छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।