निर्जीवन बीमा कम्पनीद्धारा ३४ अर्ब बीमाशुल्क संकलन, जेठमा मात्रै ३ अर्ब उठ्यो

चालु आर्थिक वर्ष २०७८-७९ को एघार महिना अवधिमा नेपालमा सञ्चालित २० निर्जीवन बीमा कम्पनीहरुले ३४ अर्ब १५ करोड ८८ लाख २३ हजार रुपैयाँ कुल बीमाशुल्क संकलन गरेका छन् ।

बैशाखसम्म ३१ अर्ब १९ करोड ७१ लाख रुपैयाँ कुल बीमाशुल्क संकलन गरेका कम्पनीहरूले जेठमा मात्रै २ अर्ब ९६ करोड १७ लाख रुपैयाँ संकलन गरेका हुन् ।

जेठमा निर्जीवन बीमा कम्पनीहरूले १ लाख ६७ हजार १० वटा बीमालेख जारी गरेका छन् । यो संख्या जेठसम्ममा कुल जारी बीमालेख संख्या २५ लाख १५ हजार ३१५ पुगेको छ । उल्लेखित बीमालेख जारी गरेर कुल २० कम्पनीहरूले यस अवधिमा उक्त ३४ अर्ब माथि बीमाशुल्क संकलन गरेका हुन् ।

विसं २०७९ जेठ मसान्तसम्ममा शिखर इन्स्योरेन्सले सबैभन्दा धेरै ४ अर्ब ४० करोड १८ लाख रुपैयाँ बीमाशुल्क संकलन गरेको छ । जेठ महिनामा मात्रै शिखरले २७ अर्ब ४५ करोड रुपैयाँ बीमाशुल्क संकलन गरेको छ । जेठसम्म निर्जीवन बीमा कम्पनीहरुले संकलन गरेको कुल बीमाशुल्क रकममा शिखरको हिस्सा १२.९० प्रतिशत छ ।

शिखर पछि दोस्रो ठूलो बीमाशुल्क संकलन गरेको सगरमाथा इन्स्योरेन्सले जेठमा २० अर्ब संकलन गर्दै २ अर्ब ७९ करोड ९४ लाख रुपैयाँ संकलन गर्दा नेको इन्स्योरेन्सले २ अर्ब ६१ करोड २८ लाख, सिद्धार्थ इन्स्योरेन्सले २ अर्ब २४ करोड ५३ लाख र एनएलजी इन्स्योरेन्सले २ अर्ब १० करोड ४९ लाख रुपैयाँ कुल बीमाशुल्क संकलन गरेको छ ।

थप १२ निर्जीवन बीमा कम्पनीले २ अर्बभन्दा कम १ अर्बभन्दा बढी बीमाशुल्क संकलन गर्दा तीन कम्पनीको बीमाशुल्क संकलन एक अर्बभन्दा कम छ । समितिले उपलब्ध गराएको तथ्याङ्क अनुसार सानिमा जनरल, जनरल इन्स्योरेन्स र नेशनल इन्स्योरेन्सले एक अर्बभन्दा कम बीमाशुल्क संकलन गरेका हुन् ।

जेठ मसान्तसम्ममा प्रिमियर इन्स्योरेन्स १ अर्ब ९२ करोड, हिमालयन जनरल इन्स्योरेन्स १ अर्ब ८७ करोड, राष्ट्रिय बीमा कम्पनीले १ अर्ब ७० करोड, आइएमई जनरल इन्स्योरेन्स १ अर्ब ५३ करोड रुपैयाँ धेरै कुल बीमाशुल्क संकलन गरेको छ ।

यसैगरी अजोड इन्स्योरेन्स १ अर्ब ४४ करोड, नेपाल इन्स्योरेन्स १ अर्ब ४० करोड रुपैयाँ, लुम्बिनी जनरल इन्स्योरेन्स १ अर्ब ३८ करोड, युनाइटेड इन्स्योरेन्स १ अर्ब ३६ करोड, प्रभु इन्स्योरेन्स १ अर्ब २७ करोड, दि ओरियन्टल इन्स्योरेन्स १ अर्ब २२ करोड, प्रुडेन्सियल इन्स्योरेन्स १ अर्ब २० करोड र एभरेष्ट इन्स्योरेन्स १ अर्ब ११ करोड रुपैयाँ बढी कुल बीमाशुल्क संकलन गरेको छ ।

यस अवधिमा सानिमा जनरल इन्स्योरेन्सले ९० करोड ६८ लाख रुपैयाँ, जनरल इन्स्योरेन्सले ८१ करोड ७८ लाख र नेशनल इन्स्योरेन्सले ८० करोड १५ लाख रुपैयाँ कुल बीमाशुल्क संकलन गरेको छ ।

कसको बीमालेख संख्या कति ?

चालु आवको दश महिनामा २० निर्जीवन बीमा कम्पनीहरूले कुल २५ लाख १७ हजार ३१५ वटा बीमालेख जारी गरेका छन् । यस अवधिमा नेको इन्स्योरेन्सले कुल जारी बीमालेखको ९.७८ प्रतिशत अर्थात २ लाख ४६ हजार ३०४ वटा बीमालेख जारी गरेको छ ।

दोस्रो ठूलो बीमालेख जारी गरेको सगरमाथा इन्स्योरेन्सले २ लाख २७ हजार ९१३ वटा बीमालेख जारी गरेको छ भने शिखरले २ लाख १२ हजार १८८ वटा र सिद्धार्थले २ लाख ११ हजार ६९४ वटा बीमालेख जारी गरेको छ ।

थप १० कम्पनीहरूले १ लाखभन्दा धेरै २ लाखभन्दा कम बीमालेख जारी गरेका छन् । यस अवधिमा एनएलजी इन्स्योरेन्सले १ लाख ७५ हजार, नेपाल इन्स्योरेन्स १ लाख ४६ हजार, प्रिमियर इन्स्योरेन्स १ लाख ४२ हजार र युनाइटेड इन्स्योरेन्सको बीमालेख संख्या १ लाख ४१ हजार भन्दा बढी छ ।

यसैगरी लुम्बिनी जनरल इन्स्योरेन्सले १ लाख २८ हजार, प्रुडेन्सियल इन्स्योरेन्स १ लाख २२ हजार, अजोड इन्स्योरेन्स १ लाख १४ हजार, प्रभु इन्स्योरेन्स १ लाख ७ हजार, आईएमई जनरल १ लाख ३ हजार र एभरेष्ट इन्स्योरेन्सले १ लाख बढी बीमालेख जारी गरेको छ ।

यस अवधिमा हिमालयन जनरल, सानिमा जनरल, जनरल इन्स्योरेन्स, राष्ट्रिय बीमा कम्पनी, दि ओरियन्टल इन्स्योरेन्स र नेशनल इन्स्योरेन्सले एक लाखभन्दा कम संख्यामा बीमालेख जारी गरेका छन् ।

सबैभन्दा कम सङ्ख्यामा बीमालेख जारी गरेको नेशनल इन्स्योरेन्सले जम्मा २१ हजार ६५ वटा मात्र बीमालेख जारी गरेको छ । दि ओरियन्टल इन्स्योरेन्स ३० हजार ६८१, र तेस्रो कम सङ्ख्यामा बीमालेख जारी गरेको राष्ट्रिय बीमा कम्पनीले ४६ हजार ४७६ वटा बीमालेख जारी गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।