‘पन्ध्रौं नाडा अटो शो’ भाद्र २६ देखि आयोजना हुने, ७५ हजारले अवलोकन गर्ने

नाडा अटोमोबाइल्स एशोशियसन अफ नेपालले भाद्र २६ देखि नाडा अटो शोको १५ औं संस्करण ‘नाडा अटो शो–२०२३’ आयोजना गर्ने भएको छ । भाद्र ३१ गतेसम्म काठमाडौंको भृकुटी मण्डप प्रदर्शनी स्थलमा ‘नाडा अटो शो २०२३’ आयोजना हुने भएको हो ।

सवारी साधन, पार्टपुर्जा, वित्तीय सेवा एवं अन्य सम्बन्धित सरोकारवाला संघ संस्थाहरुको प्रदर्शनीमा ठूला तथा साना गरि १२० वटा स्टल र ब्लकहरु रहने नाडाले जनाएको छ । उक्त प्रर्दशनीमा प्रख्यात अन्तराष्ट्रिय ब्राण्डका सवारी साधन, लुब्रिकेन्ट, टायर पार्ट–पुर्जाका साथै राष्ट्रिय ब्राण्डका अटो सामग्री उत्पादक एवं वस्तु तथा सेवा प्रदायकहरुको सहभागिता रहने छ । प्रदर्शनीमा १६ वटा ब्राण्डका चारपाङ्ग्रे, २२ वटा ब्राण्डका दुई पाङग्रे ७ वटा ब्राण्डका लाइट कमर्सियल भेहिकल, ९ वटा वित्तीय संस्था तथा ३० वटा लुब्रिकेन्ट, टायर, ब्याटरी पार्टपुर्जा एवं ग्यारेज उपकरण कम्पनीहरुको सहभागिता रहने छ ।

कोभिड महामारी लगायत अन्य विभिन्न कारणबाट नाडा अटो एक्स्पो २०२०, २०२१ र २०२२ आयोजना हुन सकेको थिएन । चार वर्षपछि हुन लागेको यस प्रर्दशनीमा अवलोकनकर्ताहरूले विद्युतीय सवारी साधनहरू लगायत चार वर्षपछि हालसम्मका नयाँ मोडलका गाडीहरू अवलोकन गर्न पाउनेछन् ।

यस्तै प्रदर्शनीलाई बढी जानकारीमुलक, सेवामूलक र ग्राहकमुखी बनाउन अटो सम्बन्धि सेवा सुविधा दिने वित्तीय सेवा, बिक्रीपछिका सेवा आदिका छुट्टाछुट्टै स्टलहरु रहने छन् । अटो सम्बन्धी जानकारी दिने म्यागेजिन तथा पत्रपत्रिकाहरुका लागि पनि छुट्टै साझा मिडिया स्टलको व्यवस्था गरिएको छ ।

आयोजकका अनुसार आर्थिक सुस्तताले अटोमोबाइल व्यवसायीमा नकारात्मक प्रभाव पार्नुका साथै सवारी साधन खरिदकर्ताको वित्तीय योजनामा समेत असर गरेको छ । हाल विद्यमान बजार सुस्तताका बावजुद पनि प्रदर्शनीमा विभिन्न अटोमोबाइल कम्पनीहरुको उत्साहजनक सहभागिताले केही हदसम्म अर्थतन्त्र चलायमान बनाउन सहयोग गर्ने छ ।

६ दिनसम्म चल्ने उक्त नाडा अटो शो २०२३ मा ७५ हजार आगन्तुकहरुले अवलोकन गर्ने विश्वास गरिएको छ । यस प्रदर्शनीको शीर्ष प्रायोजक टाटा मोटर्स जेनुइन आयल रहेको छ भने सह–प्रायोजकमा शिखर इन्स्योरेन्स कम्पनी लिमिटेड रहेको छ । यसैगरी प्रदर्शनीको डोर प्राइजमा वाडिया, टिकटिङ पार्टनरमा खल्ती, अफिसियल इन्टरनेट पार्टनरमा वल्र्डलिङ्क, फायर सेफ्टी सपोर्टमा हिटको प्रालि एवं हस्पिटल पार्टनरमा फ्रन्टलाइन हस्पिटल रहेको छ । प्रदर्शनीको व्यवस्थापन ग्लोबल एक्सपोजिसन एण्ड म्यानेजमेन्ट सर्भिसेजले गरी रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।