चौथो जिम्मेवार व्यवसाय सम्मेलन मंसिर २१ गतेदेखि आयोजना हुने

राष्ट्रिय व्यवसायिक पहल (एनबीआई)ले मंसिर २१ गतेदेखि जिम्मेवार व्यवसाय सम्मेलन (रेस्पोन्सिबल बिजनेस समिट)को चौथो संस्करण आयोजना गर्ने भएको छ। काठमाडौंको हायात रिजेन्सी होटलमा मङ्सिर २१ र २२ गते दुई दिन आयोजना हुने सम्मेलनमा नेपालसहित पाँच मुलुकका ३० वक्ताले प्रस्तुती दिनेछन् ।

२०७१ सालदेखि आयोजना हुँदै आइरहेको यो सम्मेलनको चौंथो संस्करणको थिम उदीयमान व्यापार वास्तविकताहरूमा अनुकूलन ९एडप्टिङ टू इमर्जिङ बिजनेस रियालिटिज० भन्ने रहेको छ ।

सम्मेलनमा नेपालका उद्योग व्यवसायहरूले बदलिँदो परिस्थिति र उदीयमान नव आयामहरूको परिप्रेक्ष्यमा जिम्मेवारपूर्ण ढंगले के कसरी अघि बढ्न सक्दछन् भन्ने सम्बन्धमा अन्तक्रिया हुने एनबीआई अध्यक्ष कुशकुमार जोशीले जानकारी दिए ।

अध्यक्ष जोशीका अनुसार समाज, वातावरण तथा अर्थतन्त्र गरी तीन विधाको ११ वटा विषयहरूमा विभिन्न प्रस्तुतिहरू मार्फत गहन छलफल गरिनेछ । समाज विधा अन्तर्गत आधुनिक दासत्व तथा मानव बेचबिखन, व्यवसायिक आचारसंहिता र संस्थागत सामाजिक उत्तरदायित्त्व, व्यावसायिक स्वास्थ्य तथा सुरक्षा, र व्यवसाय तथा मानव अधिकार गरी चार विषय रहनेछन् ।

वातावरण विधामा पर्यावरणमा व्यावसायिक असरको व्यवस्थापन, विपद् जोखिम न्यूनीकरण तथा पूर्वतयारी र नवीकरणिय उर्जा सम्बन्धी विषय रहने उल्लेख छ ।
त्यसैगरी, अर्थतन्त्र विधामा व्यवसायिक वातावरण निर्माण, नवप्रवर्तन तथा उद्यमशिलता, डिजिटल अर्थतन्त्र र व्यावसायिक निरन्तरता योजना गरी चार विषय रहनेछन् ।

कार्यक्रममा नेपाल तथा भारत, अस्ट्रेलिया, सिंगापुर, जापान लगायत विभिन्न देशका विज्ञ तथा वक्ताहरुको प्रस्तुती रहने जनाइएको छ । ३० भन्दा बढी वक्ताहरु रहने यस कार्यक्रममा ३ सयभन्दा बढी व्यवसायी तथा निजी क्षेत्रका प्रतिनिधिहरु, शिक्षाकर्मी, नागरिक समाज, सरकारी निकाय, बैंक तथा वित्तिय क्षेत्रको सहभागिता रहने आयोजक एनबीआईले जनाएको छ ।

“विश्वव्यापी महामारीको असर, सञ्चार प्रविधिको द्रुत विकास र प्रभाव साथै विश्वव्यापी चासोको विषय रहेका डिजिटल अर्थतन्त्र, जलवायु परिवर्तन, प्रदुषण तथा मानव अधिकारको संरक्षण लगायतका विभिन्न कारणहरूले गर्दा उद्योग व्यवसायले आफ्नो व्यावसायिक रणनीति र सञ्चालन प्रक्रियालाई परिमार्जन र अनुकूलन गर्नुपर्ने आवश्यकता गहन बन्दै गएको हुनाले हाम्रो सम्मेलन अझ बढी सान्दर्भिक हुने ठान्दछौं,” अध्यक्ष जोशीले भने ।

कार्यक्रममा काठमाडौं विश्वविद्यालय स्कूल अफ म्यानेजमेन्ट प्राज्ञिक साझेदार रहेको छ भने निजी क्षेत्रका अग्रणी संस्थाहरुको सहकार्य रहने जनाइएको छ। कोभिड महामारी र विश्वव्यापी आर्थिक संकटका कारण सम्मेलन एक वर्ष ढिलो सञ्चालन हुन लागेको बताइएको छ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।