चार अर्ब कर्जा रेटिङ गराएको सीजी इम्पेक्सको रेटिङ घट्यो

चौधरी ग्रुपद्धारा सञ्चालित सीजी इम्पेक्स प्रालिले कर्जा समीक्षाका लागि आवश्यक पर्ने वित्तीय विवरण पेस नगरेपछि रेटिङ एजेन्सी इक्रा नेपालले रेटिङ घटाएको छ।

सन् २०२२ को अप्रिल महिनामा ३ अर्ब ९२ करोड बराबरको अलपकालीन कर्जाका लागि रेटिङ गराएको कम्पनीले कर्जासम्बन्धी विवरण रेटिङ एजेन्सीलाई नबुझाएको पाइएको छ । यसअघि इक्रानेपालले ३ अर्ब ९२ करोड बराबरको कर्जाका लागि ए३ प्लस रेटिङ गरेको थियो । हाल उक्त रेटिङ ए४ प्लसमा घटुवा गरेको छ ।

इक्रानेपालले पटकपटक कम्पनीलाई सम्पर्क गर्न खोजेता पनि कम्पनीबाट कुनै प्रतिक्रिया नआएपछि एजेन्सीले कम्पनीलाई ‘इस्सुअर नट कोअपरेटिङ’ को सूचीमा राख्दै रेटिङ वीथड्रल गर्ने जनाएको छ ।

सन् २००४ मा स्थापना भएको कम्पनीले सुरुवाती चरणमा ‘एलजी’ कम्पनीका विद्युतीय तथा घरायसी सामाग्रीहरुको आयात गरी बिक्री वितरण गथ्र्यो । स्थापनाकालमा कम्पनी ‘एलजी’ ब्रान्डको आधिकारिक बिक्रेता समेत रहेको थियो ।

बिस्तारै कम्पनीले बजारमा आफूलाई स्थापित गरेसँगै ब्याल्याक एन्ड डेकोर, पिजन, केन्ट, मिडिय, सेन्सेइ ब्रान्डका भ्याकुम क्लिनर, आइरन, हिटर, फ्यान लगायतका सामाग्रीको आयात गरी बिक्री वितरण गर्ने गरेको छ ।

पछिल्लो समयमा कम्पनीले सीजी ब्रान्डका सामाग्रीको बिक्री वितरण समेत गर्दै आएको छ । कम्पनीमा विनोद चौधरीका दुई छोरा निर्वाण चौधरीको ८५ प्रतिशत र वरुण चौधरीको १५ प्रतिशत लगानी रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।