पाँच वाणिज्य बैंक लाभांशमा अझै अनिर्णित

सञ्चालनमा रहेका २० मध्ये हालसम्म १५ वाणिज्य बैंकले लाभांश दिने–नदिन टुङ्गो लागाएका छन् । पुस लागिसक्दा पनि पाँच बैंक अझै लाभांश सम्बन्धमा अनिर्णित रहेका छन् ।

कम्पनी ऐन अनुसार आर्थिक वर्ष समाप्त भएको ६ महीनाभित्र अनिवार्य रुपमा साधारण सभा सम्पन्न गरिसक्नुपर्छ । तर पारदर्शी र संस्थागत सुशासनमा राम्रो मानिने वाणिज्य बैंकहरुले समेत हालसम्म पनि लाभांश घोषणा नगरेका हुन् । पाँच बैंकले हालसम्म लाभांश वितरण गर्ने वा नगर्ने सम्बन्धी निर्णय गर्न बाँकी छ । तीमध्ये चार बैंक नेप्सेमा सूचीकृत छन् भने सरकारी स्वामित्वको राष्ट्रिय वाणिज्य बैंक नेप्सेमा सूचीकृत छैन ।

हालसम्म चार वाणिज्य बैंकहरु हिमालयन बैंक, प्राइम कमर्सियल बैंक, कुमारी बैंक र एनएमबि बैंकले यस वर्ष लाभांश वितरण नगर्ने बताइसकेका छन् । एघार बैंकले धेरेथोर लाभांश दिएका छन् । लाभांश दिएका बैंकहरुले सबैले साधारण सभा तथा लाभांश वितरण प्रयोजनार्थ बुकक्लोज गरिसकेका छन् । नबिल बैंक र नेपाल एसबिआई बाहेक ९ बैंकले साधारण सभा समेत सम्पन्न गरिसकेका छन् । नबिलले पुस १२ गते बिहीबार र एसबिआई बैंकले पुस १३ गते शुक्रबार साधारण सभा आह्वान गरेको छ। लक्ष्मी सनराइज बैंकले साधारणसभा र बुकक्लोज तोक्न बाँकी छ । यस्तै लाभांश नदिएको एनएमबि बैंकले पुस २६ गते एजीएम बोलाएको छ । सभाका लागि एनएमबिले पुस ६ गते शुक्रबार बुकक्लोज गर्दैछ ।

लाभांश दिएका एघार बैंकमा एनआईसी एशिया बैंकले सबैभन्दा धेरै ३०.५२ प्रतिशत (२९ प्रतिशत बोनस र १.५२ प्रतिशत नगद) लाभांश दिएको छ भने सिद्धार्थ बैंकले सबैभन्दा कम ४.२१ प्रतिशत नगद लाभांश दिएको छ ।

लाभांश घोषणा नगरेका बैंकहरुमा नेपाल बैंक लिमिटेड, प्रभु बैंक, कृषि विकास बैंक नेपाल इन्भेष्टमेन्ट मेगा बैंक र राष्ट्रिय वाणिज्य बैंक रहेको छ ।

? समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।