अधिकांश फाइनान्सले बनाए लगानीकर्ता निराश, तीन ओटाले मात्रै दिए लाभांंश

सञ्चालनमा रहेका पन्ध्र फाइनान्स कम्पनीमध्ये गत आर्थिक वर्ष २०७९–८० को मुुनाफाबाट सात ओटाले सेयरधनीलाई लाभांश वितरण नगरेर निराश बनाएका छन् । हालसम्म तीन ओटाले मात्रै लाभांश दिएका छन् ।

आर्थिक वर्ष २०७९–८० को मुुनाफाबाट आईसिएफसि फाइनान्स, मञ्जुश्री फाइनान्स र श्री इन्भेष्टमेन्ट फाइनान्स कम्पनीले मात्रै लाभांश वितरण गरेका हुन् । तीनओटै कम्पनीले नगद लाभांश मात्र वितरण गरेका छन् । कम्पनीले आईसिएफसिले कर सहित चुक्ता पुँजीको ६.५० प्रतिशत, मञ्जुश्रीले ५.२६ र श्री इन्भेष्टमेन्टले ५.०५ प्रतिशत नगद लाभांश दिएका हुन् ।

सात ओटा कम्पनीले लाभांश वितरण नगरेका हुन् । यस अवधिमा प्रोगेशिभ फाइनान्स, नेपाल फाइनान्स, गुहेश्वरी मर्चेन्ट, पोखरा फाइनान्स, समृद्धि फाइनान्स, र गुडविल फाइनान्सले बिना लाभांश साधारण सभा सम्पन्न गरेका छन् । मल्टिपर्पस फाइनान्सले पनि लाभांश वितरण गरेन । कम्पनीले फागुन १८ गते साधारण सभा आह्वान गरेको छ । यसरी गत आवबाट ७ फाइनान्स कम्पनीको लगानीकर्ताको हात खाली भएको छ ।

पाँच ओटाले अझै गरेनन् घोषणा

माघ २३ गते मंगलबारसम्म अझै पाँच फाइनान्स कम्पनीले लाभांश घोषणा गरेका छैनन् । हालसम्म गोर्खाज फाइनान्स, सेन्ट्रल फाइनान्स, जानकी फाइनान्स, रिलायन्स फाइनान्स र बेष्ट फाइनान्सले लाभांश घोषणा नगरेका हुन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।