सेयर बजारमा दैनिक कारोबार पुनः पाँच अर्ब नाघ्यो, पुँजी कम भएको मूल्य उचालिँदा जोखिम बढ्यो

सेयर बजारका लगानीकर्ताको मनोबल बढ्न नसकिरहेको भएपनि सोमबार सेयर बजारमा दैनिक कारोबार रकम पाँच अर्ब रुपैयाँ नाघेको छ । ठूला पुँजी भएका कम्पनीको सेयरमूल्यमा खासै उतारचढाव आउन नसकेपनि कम पुँजी भएका कम्पनीको सेयर मूल्य कारोबारीहरुले राम्रैसँग उचालेका छन् ।

पछिल्ला दिनमा उच्च बढोत्तरी गराइँदै आएको फाइनान्स इन्डैक्स आजपनि .११ प्रतिशतले उकालोे लागेको छ भने विकास बैंक र लघुवित्तको सूचक पनि एक प्रतिशतभन्दा धेरै बढेका छन् । यी क्षेत्रका पनि धेरै पुँजी भएकाभन्दा कम पुँजी भएका कम्पनीके मूल्य अस्वभाविक रुपमा वृद्धि गरिएको छ । यसले हाल सेयर मूल्य बढाइएको कम्पनीहरुमा लगानी गर्दा जोखिम समेत बढाएको छ ।

सेयर बजारमा सूचीकृत ती कम्पनीको खुद नाफा ऋणात्मक भएपनि बजारमा सेयरको आपूर्ति कम भएका कारण ती कम्पनीहरुको मूल्य कारोबारीहरुले अस्भाविक रुपमा वृद्धि गरेका हुन् । जसको टिकाउ हुने आधार नदेखिएको अनुभवी लगानीकर्ताहरु बताउँछन् । कतिपय कम्पनीको बैशाख मसान्तसम्ममा खुद नाफा ऋणात्मक भएपछि कम पुँजी भएका धेरै फाइनान्सको सेयर मूल्यमा निरन्तर सर्किट लागाएर वृद्धि गरिएको छ ।

सोमबार दैनिक कारोबार रकम पाँच अर्ब नाघेको छ । यसदिन ३२२ कम्पनीका १ करोड ७ लाख ७ हजार ८७८ कित्ता सेयर ६६ हजार ५१९ पटक खरिद बिक्री भएका छन् । दिनभरमा ५ अर्ब ७ करोड ७२ लाख ५५ हजार ११६ रुपैयाँमा समेटिएको छ । अघिल्लो दिनको तुलनामा ७० करोड २७ लाखले कारोबार रकम बढेको हो । साताको दोस्रो कारोबार दिन सोमबार बजार सूचक नेप्से ३.२१ अंकले बढेर २०६६.१६ बिन्दुमा पुगेको छ ।

अघिल्लो कारोबार दिन आइतबार ५.३७ अंकले घटेर २०६२.९४ विन्दुमा बन्द हुँदा ४ अर्ब ३७ करोड ४५ लाख रुपैयाँको कारोबार भएको थियो । आज सेयर कारोबारमा आएका ३२२ मध्ये १७८ कम्पनीको मूल्य वृद्धि भएको छ भने १२३ कम्पनीको सेयर मूल्य घटेको छ । २० कम्पनीको मूल्य स्थीर रहेको छ ।

आजको बजारमा सात ओटा उपसमुहगत सूचकहरु बैंकिङ्ग, होटल तथा पर्यटनमुलक, लगानी, जीवन बीमा, उत्पादन तथा प्रशोधनमुलक, निर्जीवन बीमा र ब्यापार एक प्रतिशतभन्दा कम घटेका छन् ।

दुई कम्पनीको सेयर मूल्यमा सकारात्मक सर्किट

सोमबार दुई कम्पनीको सेयर मूल्यमा सकारात्मक सर्किट लागेको छ । यसदिन नेपाल फाइनान्स र गणपति लघुवित्त वित्तीय संस्था लिमिटेडको सेयर मूल्य दश प्रतिशतले बढेको छ । यससँगै नेपाल फाइनान्सको प्रतिकित्ता मूल्य ९२० रुपैयाँ तथा गणपति लघुवित्तको १५९१.१० रुपैयाँ पुगेको छ । साथै मकर जितुमाया सुरी हाइड्रोपावरको ७.२१ प्रतिशत, शिवश्री हाइड्रोपावर ६.९१ र आरम्भ चौतारी लघुवित्तको सेयर मूल्य ६.३९ प्रतिशतले बढेको छ ।

आजको बजारमा बुद्धभुमि नेपाल हाइड्रोपावरको सेयर मूल्य सर्वाधिक ७.०१ प्रतिशतले घटेको छ । यस्तै कृषि विकास बैंक डिबेञ्चर २०८३ को ३.७६ प्रतिशत, समाज लघुवित्त ३.२६ प्रतिशत, अपर हेवाखोला हाइड्रोपावर २.८६ प्रतिशत र पाँचथर पावर कम्पनीको लगानीकर्ताले २.८४ प्रतिशतले गुमाएका छन् ।

मेरो माइक्रोफाइनान्सको सर्वाधिक कारोबार

मेरो माइक्रोफाइनान्सको आज सर्वाधिक कारोबार भएको छ । सबैभन्दा धेरै कारोबार भएको उक्त लघुवित्तको २४ करोड ३२ लाख १८ हजार रुपैयाँको ३ लाख ६४ हजार ६९५ कित्ता सेयर खरिद बिक्री भएको छ ।

यस्तै एनआरएन इन्फ्रास्टक्चर एण्ड डेभलपमेन्ट लिमिटेडको १८ करोड ४१ लाख ५३ हजार रुपैयाँ, पोखरा फाइनान्सको १६ करोड १७ लाख रुपैयाँ, माउन्टेन इनर्जी लिमिटेडको १४ करोड ५८ लाख ६ हजार र मञ्जुश्री फाइनान्सको १४ करोड २८ लाख रुपैयाँ बराबरको कारोबार भयो । कारोबार संख्याका आधारमा हिमालयन रि इन्स्योरेन्सको सबैभन्दा धेरै १ हजार ७६७ पटक सेयर कारोबार भएको छ ।

सोमबारको कारोबारपछि कुल बजार पुँजीकरण ३२ खर्ब ७६ अर्ब ३२ करोड ६३ लाख ७४ हजार रुपैयाँमा समेटिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।