अर्थमन्त्री खतिवडाले एडीबीको बैठकमा वित्तीय स्रोत जुटाउन पहल गर्ने

अर्थमन्त्री डा.युवराज खतिवडा एशियाली विकास बैंकको बोर्ड अफ गभर्नर्सको ५२ औं वार्षिक बैठकमा भाग लिन आज फिजी प्रस्थान गरेका छन्।

उक्त बैठकमा अर्थमन्त्री खतिवडाले नेपालको संंघीयता कार्यान्वयन, पूर्वाधार निर्माणलगायत समग्र विकासको लागि आवश्यक पर्ने वित्तीय स्रोत जुटाउन पहल गर्ने जनाइएको छ।

यस्तै नेपालमा लगानीको वातावरण सुधार हुर्दै गएको सन्देश विश्व समुदायका वित्तीय क्षेत्रका जानकारी दिने, वित्तीय संघीयतालाई व्यवहारिक रुपमा सफल कार्यान्वयनको प्रक्रियामा प्रवेश गरेको विश्व समुदायलाई जानकारी समेत दिने अर्थमन्त्रालयले जनाएको छ।

आगामी मे २ देखि ५ सम्म फिजीको नादीमा आयोजना हुने बैठकमा मन्त्री खतिवडाले नेपालको गर्भनरको रुपमा वार्षिक बैठकका विषय सूचीहरुमा धारणा राख्नेछन् ।

बैठकमा अर्थमन्त्री खतिवडाले एशियाली विकास बैंकका अध्यक्ष तथा दक्षिण एशियाका महानिर्देशक, युरोपियन लगानी बैंक, ओफिडलगायतका वित्तिय संस्थहरुका उच्च पदस्थ प्रतिनिधिहरुसँग महत्वपूर्ण छलफल तथा भेटघाट गर्नेछन्।

दक्षिण एशियाली क्षेत्रिय सहयोग (सार्क) अर्थमन्त्रीस्तरीय अनौपचारिक बैठकलाई अध्यक्षता गर्दै सम्बोधन गर्ने कार्याक्रम रहेको अर्थमन्त्रालयले जनाएको छ। यसका साथै सार्क विकास कोषको गर्भनिङ काउन्सिलको बैठकमा समेत मन्त्री खतिवडा सहभागी हुनेछ।

बैठकमा सहभागी हुन अर्थमन्त्री सहित अन्तर्राष्ट्रिय आर्थिक सहायता समन्वय महाशाखा प्रमुख फिजी प्रस्थान गरेका हुन्। अर्थमन्त्री खतिवडा बैशाख २१ गते साँझ स्वदेश फर्किने कार्यक्रम छ।