नेष्डो समृद्ध लघुवित्तले डेढ सय प्रतिशत हकप्रद जारी गर्ने, मर्जरका लागि पनि तयार

नेष्डो समृद्ध लघुवित्त वित्तीय संस्था लिमिटेडले चुक्तापूँजी बढाउन डेढ सय प्रतिशत हकप्रद शेयर बिक्री गर्ने प्रस्ताव अघि सारेको छ । साथै कम्पनीले जारी पूँजी, चुक्ता पूँजी र अधिकृत पूँजी बढाउने प्रस्ताव पनि साधारणसभामा लैजाने जनाएको छ ।

संस्थाले साउन १८ गते हुने विशेष साधारणसभामा एक बराबर १.५ हकप्रद शेयर निष्कासन गर्ने प्रस्ताव लग्दैछ ।

त्यस्तै संस्थाको अधिकृत ५० करोडबाट बढाएर एक अर्ब पुर्याउन, जारी पूँजी १० करोडबाट २५ करोड पुर्याउने तथा हाल कायम चुक्ता पूँजी ७ करोड बाट बढाएर १७ करोड ५० लाख पुर्याउने प्रस्ताव समेत गरेको छ ।

पर्वतको सदरमुकाम कुश्मामा केन्द्रीय कार्यालय रहेको संस्थाले संस्थापकतर्फ ७० र सर्वसाधारणतर्फ ३० प्रतिशत सेयरलाई यथावत राख्ने भएको छ ।
साथै संस्थाले मर्जर तथा प्राप्ति सम्बन्धि विशेष प्रस्ताव पनि साधारणसभामा राख्ने भएको छ ।