ब्याजदर बढ्ने संकेतले शेयर कारोबार एंवम सूचकमा गिरावट

सूचीकृत कम्पनीहरुले गतवर्षको लाभांश घोषणा गर्ने, वितरण गर्ने तथा चालु आर्थिक बर्षको पहिलो त्रैमासको वित्तीय विवरण सार्वजनिक गरिरहदा समेत शेयर लगानीकर्ताको आत्मबल भने फर्किन सकेको छैन् । लगानीकर्ताको आत्मबल कमजोर हुँदा शेयर कारोबारमा उत्साह थपिन सकेको छैन भने सूचक समेत ओरालो लागेको छ ।

शेयर बजारका आधारभूत पक्ष सबल हुँदाहुँदै पनि लगानीकर्ताको आत्मबल सुधार हुन सकेको छैन । लगानीकर्ताहरु दशैं तिहार पछि बजार बढ्ने आशामा बसेपनि ठिक त्यसको विपरित नेप्से परिसूचक ओरालो लागेपछि शेयर लगानीकर्तामा झनै अन्योलता बढेको छ ।

बैंकिङ प्रणालीमा देखा परेको तरलता अभावले पनि शेयर बजार प्रभावित भएको छ । बैंक तथा वित्तीय संस्थाहरुको पछिल्लो समय प्रकाशित गरेको विवरणमा आधार दर बढेसँगै ब्याजदर बढ्ने स्पष्ट संकेत मिलेपछि शेयर बजारमा झन निराशा छाएको हो । नयाँ ब्याजदर सार्वजनिक गरेका धेरैजसो बैंकको आधार ब्याजदर बढेको पाइएको छ । एकातिर तरलता अभाव चर्कर्ने र अर्कोतर्फ ब्याजदर बढ्ने संकेतले शेयर लगानीकर्ताको आत्मबल झन कमजरो भएको देखिन्छ ।

आइतबार नेप्से सूचक ६.८८ अंकले घटेर ११३९.२९ विन्दुमा झरेकोे छ । १६१ कम्पनीको ७ लाख ८४ हजार ७४० कित्ता सेयर खरिदबिक्री भएको बजारमा १७ करोड ५५ लाख रुपैयाँ बराबरको शेयर किनबेच भयो । शेयर बजार ओरालो लाग्दा समग्र बजार पूँजीकरण १४ खर्ब ७७ अर्बमा खुम्चिएको छ । 

कारोबार भएका ११ वटा समूहमध्ये म्युचुअल फन्ड समूहको सूचक मात्र सकारात्मक रहेको छ । बाँकी सबै समूहका सूचक राताम्मे भएका छन्। सबैभन्दा बढी उत्पादनमूलक समूह ३७.३५ अंकले घटेको छ । वाणिज्य बैंक समूहमा पनि ६.७८ अंकको गिरावट आएको छ ।

सबैभन्दा धेरै प्रभु बैंकको १ करोड ५२ लाख रुपैयाँ भन्दा बढीको शेयर किनबेच भएको छ । यसदिन एनआईसी एशिया ग्रोथ फण्डको इकाई मूल्य सबैभन्दा धेरै ४.५२ प्रतिशतले बढेको छ । यस्तै वरुण हाइड्रो, चिलिमे, पाँचथर पावर तथा रैराङ हाइड्रो लगायतको शेयर मूल्य बढेको छ ।