एनएमबि बैंकको शेयर घटाएर किन्नेहरुको चाप, कारोबार उच्च,मूल्य घट्यो

ओम डेभलपमेन्ट बैंकसँग मर्जर गरेपश्चात शेयर कारोबार खुलेको एनएमबि बैंकको शेयर मूल्य घटाएर खरिद गर्नेहरुको चाप देखिएको छ। मूल्य घटाएर खरिद गर्नेहरु अधिक हुँदा बैंकको शेयर मूल्य घटेको छ भने एक घण्टाको अवधिमा सबैभन्दा उच्च कारोबार भएको छ।

विहीबार कारोबार खुलेको एक घण्टाको अवधिमा एनएमबि बैंकको मात्रै ५ करोड ६० लाख बराबरको शेयर किनबेच भएको छ। जबकि यस अवधिमा ९६ कम्पनीको कारोबार हुँदा ७ करोड २४ लाख बराबरको मात्र शेयर किनबेच भएको छ ।

मार्केट डेप्थमा एनएमबिको शेयर बिक्री गर्नेहरु भन्दा खरिद गर्नेको चाप अधिक देखिएको छ । तर शेयर खरिद गर्न चाहानेहरुले मूल्य घटाएर खरिद माग राखेका छन् । मार्केट डेप्थमा ८८ हजार बढी कित्ता शेयर खरिदको माग रहदा बिक्रीमा ३७ हजार कित्ता मात्र देखिएको छ ।

मूल्य घटाएर शेयर खरिद गर्नेहरु सक्रिय हुँदा कम्पनीको शेयर मूल्य समेत घटेको छ । एक घण्टाको कारोबार अवधिमा बैंकको शेयर मूल्य २.३७ प्रतिशतले झरेको छ । मर्जरपश्चात बैंकको पहिलो शेयर कारोबारको लागी नेपाल स्टक एक्सचेञ्जले ३५१ रुपैयाँको कारोबार रेञ्ज प्रदान गरेकामा बैंकको शेयरमूल्य ३४३ रुपैयाँमा झरेको छ ।

चौध महिना भन्दा लामो समयसम्म शेयर कारोबार गर्न नपाएका ओम र झण्डै पाँच महिना कारोबार बन्द रहेको एनएमबिको कारोबार खुलेपछि बिक्री चाप बढेको हो । एनएमबि भन्दा पनि ओमबाट एनएमबिमा परिणत भएको शेयर बिक्री गर्नेहरुको चाप अधिक रहेको अनुमान गर्न सकिन्छ । मर्जर अघिको बजार मूल्यको आधारमा ओमका लगानीकर्ताहरु नाफामा रहेकाले उनीहरु नाफा बुक गर्नतर्फ लागेको देखिन्छ ।

एक घण्टाको अवधिमा नेप्से सूचक भने २.५४ अंकले घटेर ११३५.४८ विन्दुमा झरेको छ । कारोबार आएका अधिकांस समूहका सूचक नकारात्मक देखिएका छन् । यसअवधिसम्म ९६ कम्पनीको ७ करोड २४ लाख बराबरको शेयर किनबेच भएको छ ।