विजय लघुवित्तको नाफा १९१ प्रतिशतले बढ्यो, जगेडाकोष झनै बलियो

विजय लघुवित्त वित्तीय संस्था लिमिटेडले चालु आर्थिक वर्षको प्रथम त्रैमासमा अघिल्लो वर्षको तुलनामा १९१.७ प्रतिशतले खुद नाफा बढाएको वित्तीय विवरण सार्वजनिक गरेको छ ।

लघुवित्तले पहिलो तीन महिनामा २ करोड २५ लाख रुपैयाँ खुद नाफा गरेको छ । अघिल्लो आर्थिक वर्षको यसै अवधमिा संस्थाले ७७ लाख १३ हजार रुपैयाँ खुद नाफा कमाएको थियो ।

कम्पनीको संचालन मुनाफा तथा खुद ब्याज आम्दानीमा उच्च सुधार आउँदा नाफा समेत उच्चदरले बढेको हो । समीक्षा अवधिमा ६५ करोड ७० लाख रुपैयाँ निक्षेप संकलन गरी ३ अर्ब २२ करोड कर्जा प्रवाह गरेको संस्थाले ६ करोड १ लाख रुपैयाँ खुद ब्याज आम्दानी गरेको छ । जसले बैंकहरुबाट २ अबै ४१ करोड सापट लिएको छ ।

चुक्ता पुँजी १९ करोड ४८ लाख रुपैयाँ रहेको संस्थाको जगेडाकोषमा १० करोड ८४ लाख रुपैयाँ छ । जसको जगेडाकोष समेत १२३.४२ प्रतिशतले बढेको हो ।

संस्थाको प्रतिशेयर आम्दानी ४६.२० रुपैयाँ रहेको छ भने प्रतिशेयर नेटवर्थ १५५.६९ रुपैयाँ पुगेको छ ।