साना किसान लघुवित्तको प्रतिशेयर आम्दानीमा ह्रास, पूँजी वृद्धिको अनुपातमा बढेन नाफा

साना किसान विकास लघुवित्त वित्तीय संस्था लिमिटेडले चालु आर्थिक वर्षको पहिलो त्रैमासमा १३ करोड ७७ लाख रुपैयाँ खुद नाफा गरेको छ । गत आर्थिक बर्षको यसै अवधिकोे तुलनामा १२.५१ प्रतिशतले बढी हो ।

गत वर्षको यही अवधिमा संस्थाले १२ करोड २४ लाख रुपैयाँ खुद नाफा आर्जन गरेको थियो । यस अवधिमा संस्थाले १९ करोड ५७ लाख संचालन नाफा गरेको छ।

समीक्षा अवधिमा १९ अर्ब ३४ करोड सापटी लिई १९ अर्ब ४९ करोड कर्जा प्रवाह गरेको संस्थाले यस अवधिमा २३ करोड ६ लाख रुपैयाँ खुद ब्याज आम्दानी गरेको छ ।

संस्थाको चुक्ता पूँजी ७८ करोड ६० लाख रुपैयाँ छ । जगेडाको आकार २२.२१ प्रतिशतले बढेर १ अर्ब ८१ करोड रुपैयाँ पुगेको छ ।

चुक्ता पूँजी वृद्धि भए अनुसार खुद नाफा बढ्न नसक्दा संस्थाको प्रतिशेयर आम्दानी खस्किएको छ । प्रतिशेयर आम्दानी ७ रुपैयाँ ७६ पैसाले घटेर ७० रुपैयाँ १२ पैसामा झरेको छ । लघुवित्तको प्रतिशेयर नेटवर्थ ३३१ रुपैयाँ ०९ पैसा रहेको छ ।