समस्याग्रस्त संस्थाहरु संगाल्दै समृद्धि फाइनान्स, क्रिष्टल फाइनान्स किन्ने

नेपाल राष्ट्र बैंकले वल्र्ड मर्चेन्ट बैंकिङ एण्ड फाइनान्सलाई समस्याग्रस्त बाट फुकुवा गरे पछि समृद्धि फाइनान्सको नामबाट वित्तीय कारोबार थालेको समृद्धि फाइनान्सले अर्को समस्याग्रस्त संस्था क्रिष्टल फाइनान्स खरिद गर्ने भएको छ ।

समृद्धि फाइनान्स र क्रिष्टल फाइनान्सबिच गत साता खरिद सम्झौतामा हस्ताक्षर भएको छ । फाइनान्स किन्ने समझदारी गरी राष्ट्र बैंकमा निवेदन दिएको समृद्धि फाइनान्सका प्रमुख कार्यकारी अधिकृत पुष्प प्रसाद श्रेष्ठले बताए । क्रिष्टल फाइनान्स समस्याग्रस्त सूचीमा रहेकाले राष्ट्र बैंकको निर्देशन अनुसार खरिद प्रक्रिया अघि बढ्ने उनले बताए । 

नेपाल राष्ट्र बैंकले क्रिस्टल फाइनान्सलाई २०६९ असोज ७ गते समस्याग्रस्त घोषणा गरेको थियो ।

नयाँ लगानीकर्ताको प्रवेशले वल्र्ड मर्चेन्ट बैंकिङ एण्ड फाइनान्स समस्याग्रस्त बाट फुकुवा भई समृद्धि फाइनान्स बनेको थियो । चालु आर्थिक बर्षको पहिलो त्रैमासको वित्तीय विवरण अनुसार फाइनान्सको चुक्ता पूँजी २६ करोड ५६ लाख रुपैंया छ । क्रिष्टल फाइनान्सको चुक्ता पूँजी ७ करोड रुपैयाँ छ ।

राष्ट्र बैंकले फाइनान्स कम्पनीहरुको न्युनतम चुक्ता पूँजी ८० करोड रुपैंया कायम गर्नु पर्ने व्यवस्था गरेको छ । सोही अनुसार अब समृद्धि फाइनान्सले पूँजी बिस्तार गर्न क्रिष्टल फाइनान्सलाई किन्न लागेको हो । राष्ट्र बैंकले तोकेको न्यूनतम पूँजी पुर्याउन फाइनान्सलाई अझै ५३ करोड ४४ लाख रुपैयाँ आवश्यक पर्छ।

फाइनान्सले गत कार्तिक २५ गते समृद्धि फाइनान्सको नामबाट कारोबार सुरु गरेको थियो ।