पचास करोड राजश्व चुहावट आरोपमा गुप्ताद्वय विरुद्ध मुद्दा दायर

राजश्व अनुसन्धान विभागले विभिन्न कम्पनीमार्फत भन्सार चोरी पैठारी गरी राजश्व चुहावट गरेको आरोपमा रुपन्देहीका दुई जनाविरुद्ध मुद्दा चलाएको छ।

रुपन्देहीको सम्मरीमाइका स्थित स्थाईलेखा नम्बर ६०६१९१५१७० को श्रुति ट्रेडर्स का सञ्चालक (प्रोपाईटर) आशीष गुप्ता र उक्त फर्मका मुख्य कारोबारी सन्नी गुप्ता समेत दुई जनालाई भन्सार चोरी पैठारी गरी राजश्व चुहावट गरेको अभियोगमा ४९ करोड ६५ लाख बिगो कायम गरी आइतबार रुपन्देही जिल्ला अदालतमा मुद्दा दायर गरिएको विभागले जनाएको छ।

विभागले राजस्व चुहावट (अनुसन्धान तथा नियन्त्रण) ऐन, २०५२ को दफा ३ ले निषेधित कार्य गरी सोही ऐनको दफा ४ (क) र (ख) बमोजिमको कसुरजन्य कार्य गरेकोले राजस्व चुहावट (अनुसन्धान तथा नियन्त्रण) ऐन, २०५२ को दफा २ (छ १) बमोजिम कसुर अपराधमा राजस्व चुहावट (अनुसन्धान तथा नियन्त्रण) ऐन, २०५२ को दफा २३ को उपदफा (१) वमोजिम मुद्दा दर्ता गरेको हो।

उनीहरुविरुद्ध बिगोको दोब्बरसम्म जरिवाना र तीन वर्ष कैद सजायको माग दावी गरिएको विभागका महानिर्देशक दीर्घराज मैनालीले जानकारी दिए। अभियुक्त गुप्ता र श्रुति ट्रेडर्सका मुख्य कारोवारी सन्नी गुप्ताले न्यून बिजकीकरण गर्ने, बिक्री बिलको रकम आम्दानीमा नदेखाउने, तिर्नु नपर्ने खरीदको लागत देखाउने र मालवस्तु विनाबिल र विजक बिक्री गर्ने गरेको अनुसन्धानमा खुलेको छ।

यस्तै मौज्दात खातामा मालवस्तु देखिने तर गोदाममा मालवस्तु नदेखिएको समेत विभागले जनाएको छ।