आइ.सि.एफ.सि. फाइनान्सको १३ प्रतिशत लाभांश अनुमोदन

आइ.सि.एफ.सि. फाइनान्स लिमिटेडको मंगलबार सम्पन्न सोह्रौं वार्षिक साधारण सभाबाट सञ्चालक समितिले प्रस्ताव गरेको १३ प्रतिशत लाभांश अनुमोदन भएको छ।

सि.एम.डि. फुडल्याण्ड, टंगाल, काठमाण्डौमा मंगलबार सम्पन्न सभाले आर्थिक वर्ष २०७५/७६ को मुनाफाबाट चुक्ता पूँजीको ८ प्रतिशत नगद लाभांश तथा ५ प्रतिशत बोनस शेयर दिने प्रस्ताव सर्वसम्मतबाट पारित गरेको हो।

वार्षिक साधारण सभाले सञ्चालक समितिमा प्रतिनिधित्व गर्ने तीन जना टंकराम गौतम, अच्युतराज आचार्य र श्रीमती हेमशिखा जोशी गर्गलाई आगामी चार वर्षको लागि सर्वसम्मतबाट संचालकमा चयन गरेको छ।

साथै, सभाले आर्थिक वर्ष २०७६/७७ को लागि बाह्य लेखापरीक्षक एस.ए.आर.एसोसिएट्सलाई नियुक्त गरेको छ।

चुक्ता पूँजी ८८ करोड २१ लाख रहेको यस फाइनान्सले हालसम्म आफ्नो १८ वटा शाखा तथा १ एक्सटेन्सन काउन्टार र १७ वटा ए.टि.एम. मार्फत ७८ हजार भन्दा बढी ग्राहकलाई सेवा दिँदै आइरहेको छ।

फाइनान्सले हालसम्म ११ अर्ब ३९ करोड निक्षेप संकलन गरि ९ अर्ब ३९ करोड कर्जा प्रवाह गरिसकेको छ।