सात स्थानीय तहमा मात्रै वाणिज्य बैंक पुग्न बाँकी

हरेक स्थानीय तहमा वाणिज्य बैंकको शाखा सञ्जाल विस्तार गर्ने सरकारी नीति सार्थक हुने बाटोमा पुगेको छ। नेपाल राष्ट्र बैंकका अनुसार सरकारी नीति अनुसार चालु आर्थिक वर्षको ७ महिना अवधिमा कूल ७५३ स्थानीय तहमध्ये ७४६ तहमा वाणिज्य बैंकका शाखा विस्तार भई बैंकिङ्ग पहुँच कायम भएको हो।

अब ७ स्थानीय तहमा मात्रै वाणिज्य बैंकको शाखा विस्तार हुन बाँकी रहेको छ। केन्द्रीय बैंकको अनुसार सुदूरपश्चिम र वाग्मति प्रदेशको दुई।दुई स्थान, तथा गण्डकी, कर्णली र प्रदेश नम्बर १ को एक।एक स्थानीय तहमा वाणिज्य बैंकको शाखा सञ्जाल विस्तार हुन बाँकी रहेको हो। प्रदेश नम्बर २ (१३६ स्थानीय तह) र ५ को सबै (१०९) स्थानीय तहमा वाणिज्य बैंकको शाखा विस्तार भैसकेको छ ।

केन्द्रीय बैंकका अनुसार माघ मसान्तसम्ममा वाणिज्य बैंक, विकास बैंक, वित्त कम्पनी, र लघुवित्तको गरि कूल १६४ वटा संस्थाले ९ हजार ५५० वटा शाखा मार्फत बैंकिङ्ग सेवा प्रवाह भएको छ। पूर्वाधार विकास बैंकको शाखा १ वटा छ।

जसमध्ये २७ वटा वाणिज्य बैंकको कूल शाखा संख्या ४ हजार ७७ वटा, २४ विकास बैंकको शाखा संख्या १ हजार ३११ वटा, २२ वित्त कम्पनीको २३३ वटा, ९० वटा लघुवित्त संस्थाले ३ हजार ९२९ वटा शाखा सञ्जाल विस्तार गरेका छन्।

माघ एक महिनामा मात्रै वाणिज्य बैंकको ६६ वटा, विकास बैंकको १८, वित्त कम्पनीको ४ शाखा, र लघुवित्त कम्पनीहरुले ६८ वटा गरि कूल १५६ वटा शाखा विस्तार गरेका हुन्।

२०७६ असार मसान्तको तुलनामा बैंक तथा वित्तीय संस्थाको संख्या १७१ वटाबाट घटेर १६४ मा झरेको छ भने शाखा संख्या ८६४ ले बढेर ९ हजार ५५० पुगेको छ। २०७६ असार मसान्तमा बैंक तथा वित्तीय संस्थाको शाखा संख्या ८ हजार ६८६ रहेको थियो।