महङ्गो मूल्यमा औषधि किन्ने ओबिसिआइसँगको सम्झौता स्वास्थ्य मन्त्रालयद्धारा रद्ध

स्वास्थ्य मन्त्रालयद्धारा महङ्गो मूल्यमा पनि औषधि किन्ने सम्झौता गरेको ओम्नी बिजनेस कर्पोरेट इन्टरनेशनल प्रालि (ओबिसिआई) संँगको सम्झौता रद्ध गरेको छ।

स्वास्थ्य तथा जनसंख्या मन्त्रालयले आज गरेको पत्रकार सम्मेलनमा स्वास्थ्य विभागका महानिर्देशक महेन्द्रप्रसाद श्रेष्ठले सम्झौतानुसार सामग्री ल्याउन नसक्ने भएपछि ओम्नी बिजनेस कर्पोरेट इन्टरनेशनल प्रालि (ओबिसिआई) संँगको सम्झौता रद्द गरिएको जानकारी दिए।

“हामीलाई उक्त कम्पनीले भनेको समयमा औषधिजन्य सामग्री ल्याउन नसक्ने जनाएको छ”, उनले भने, “त्यसैले उक्त कम्पनीसंँग औषधि ल्याउने सहमति रद्द गरिएको हो ।” उनले सम्झौतानुसार उक्त कम्पनीले १८ प्रतिशत रकम खर्च गरेर १० प्रतिशत मात्र औषधि ल्याएको जानकारी दिए।

सरकारले कोभिड १९ को रोकथाम र नियन्त्रणका लागि चीनबाट औषधिजन्य सामग्री ल्याउनका लागि ओबिसिआई कम्पनीले सम्झौता अनतुसारको औषधि ल्याउन नसकेपछि सम्झौता रद्द गरिएको हो ।

विभागका महानिर्देशक श्रेष्ठले सहमतिअनुसार औषधि नल्याएको हुनाले उक्त कम्पनीको धरौटी जफत गर्नाका साथै कालोसूचीमा राख्नका लागि सम्बन्धित निकायलाई अनुरोध समेत गरिने जानकारी दिए।

महानिर्देशक श्रेष्ठले अहिले संकटका बेला उक्त कम्पनी मार्फत ल्याइएको सामग्रीमा २० प्रतिशतभन्दा बढी मूल्य परेको समेत स्वीकार गरे।
उक्त कम्पनीसँंग केही दिनअघि मात्र द्रुतगतिमा औषधि ल्याइने सम्झौता भएको थियो । उक्त सम्झौतानुसार गत आइतबार कम्पनीले कोभिड १९ को रोकथाम र नियन्त्रणका लागि औषधिजन्य सामग्री ल्याएको थियो ।

उनले उक्त कम्पनीसँंगको सम्झौता रद्द गरेर पुनः बिहीबारदेखि अर्को सम्झौताका लागि प्रक्रिया थालिने जानकारी दिए। उनका अनुसार तीन दिनको बोलपत्र आह्वान निकालेर पाँच दिनभित्र औषधिजन्य सामग्री ल्याउने मन्त्रालयको तयारी छ।

“अहिलेलाई हामीसंँग पर्याप्त मात्रामा पुग्ने औषधि रहेको छ”, उनले भने, “बिरामीको स्वास्थ्यको उपचार गर्न संलग्न चिकित्सक र स्वास्थ्यकर्मीलाई हामी प्रशस्त औषधिजन्य उपकरण दिन सक्छौं।”