मोबाइल भ्यानमार्फत खाद्यान्न बिक्री गर्दै साल्ट ट्रेडिङ

कोरोना भाइरस संक्रमणलाई ध्यानमा राखी नेपाल सरकारले दुई साता लामो लकडाउन गर्दा उपभोक्तालाई समस्या भएकाले सरकारी स्वामित्वमा सञ्चालित साल्ट ट्रेडिङले खाद्यान्नको बिक्री वितरण गरेको छ ।

कर्पोरेशनले बुधबार पनि मोबाइल भ्यानमार्फत नुन, चिनी, मैदा, दाल तथा गेडागुडी बिक्री गरिएको जनाएको छ ।

उपभोक्ताको मागअनुसार भ्यान पठाएर खाद्यान्न बिक्री गरिँदैआएकामा बुधबार काठमाडौँ, ललितपुर र भक्तपुरका विभिन्न वडामा गएर बिक्री गरिएको साल्ट ट्रेडिङका सूचना अधिकृत कुमारराज भण्डारीले जानकारी दिए।

उनका अनुसार बुधबारका लागि तीन स्थानमा विभिन्न मार्ग बनाएर खाद्यान्न बिक्री गरिएको थियो । सो अनुसार सामाखुसी, टोखा, गंगबु, गौरीगाउँ र जाल्पाचोक क्षेत्रमा रु एक लाख पाँच हजारको खाद्यान्न बिक्री गरिएको छ ।

त्यस्तै बालाजु, नयाँबजार, खुसीबुँ र चक्रपथ क्षेत्रमा ८६ हजार र कुपण्डोल, हनुमानस्थान, सानेपा, पाटन लगायत क्षेत्रमा ८० हजार बराबरको खाद्यान्न बिक्री गरिएको छ ।

त्यस्तै कालीमाटी काउण्टरबाट आज मात्र ९५ हजार ६ सयभन्दा बढी खाद्यान्न बिक्री गरिएको उनले जानकारी दिए। तीन मोबाइल भ्यान र कार्यालयबाट गरी आज मात्र तीन लाख ६६ हजार सात सयभन्दा बढीको कारोवार भएको छ ।

घुम्ती सेवाबाहेक साल्ट ट्रेडिङले कालीमाटी, सतुङ्गल र कोटेश्वर गरी तीन स्थानबाट आउटलेट राखी खाद्यान्न र ग्यासको बिक्री गर्दै आएको छ ।

हाल लकडाउनका समयमा हुने चर्को मूल्यवृद्धि र खाद्यान्नबाट उपभोक्तालाई केही राहत दिन मोबाइल भ्यानबाट घुम्ती सेवा दिइहेको सूचना अधिकृत भण्डारीले बताए।