तीन सय वर्ष यताकै खराब आर्थिक संकुचन तर्फ बेलायत

यस वर्ष बेलायतको अर्थतन्त्र ३०० वर्षकै खराब आर्थिक संकुचन तर्फ बढेको छ।

कोरोना भाइरसको महमारी नियन्त्रण गर्न लागू गरिएको बन्दाबन्दीका कारण अर्थतन्त्र व्यापक संकुचनमा जान लागेको हो ।

त्यहाँको केन्द्रीय बैंक ‘बैंक अफ इंगल्याण्ड’ (बीओई)ले बताएअनुसार जुनसम्मको तीन महीनामा बेलायती अर्थतन्त्र २५ प्रतिशतले खुम्चनेछ।

वर्षभर भने अर्थतन्त्रमा १४ प्रतिशतको संकुचन आउने जोखिम छ । यो सन् १७०९ को महा ठन्डीयताकै सबैभन्दा ठूलो कमी हुनेछ । सरकार र बीओईले महामारीको बेलामा अर्थतन्त्रलाई टेवा दिन व्यापक स्टिमुलस कार्यक्रम ल्याइरहेको भएपनि अर्थतन्त्रमा ऐतिहासिक संकुचन आउने देखिएको छ । सरकारले व्यापक ऋणपत्र खरीद कार्यक्रम ल्याएको छ ।

आपतकालीन उपाय अन्तर्गत १ खर्ब पाउन्ड खर्चिएको छ । बीओईले पनि ब्याजदर घटाएर अहिलेसम्मकै न्यून स्तरमा राखेको छ । आगामी महीनाहरुमा लकडाउन खुकुलो बनाइयो भने आगामी वर्ष भने अर्थतन्त्रमा तीव्र पुनःबर्हाली आउने समेत बैंकको भनाइ छ ।

सन् २०२१ मा अर्थतन्त्र १५ प्रतिशतले बढ्ने बीओईले बताएको छ । विज्ञहरुले भने अर्थतन्त्र यति छिट्टै पुनःबर्हाली हुनेमा शंका व्यक्त गरेका छन् । जुनमा भने बीओईले परिमाणात्मक खुकुलोपना बढाउने अपेक्षा गरिएको छ ।