मुक्तिनाथ विकास बैंक लिमिटेड (MNBBL) ले चालु आर्थिक वर्षको तेस्रो त्रैमाससम्ममा ६७ करोड ६० लाख ३४ हजार रुपैयाँ खुद नाफा आर्जन गरेको छ। पछिल्लो तीन महिनामा मात्रै बैकले २० करोड ३५ लाख रुपैयाँ खुद नाफा बढाएको हो।
गत आवको यसै अवधिमा बैंकले ६२ करोड ५५ लाख ७५ हजार रुपैयाँ नाफा कमाएको थियो। गत आवको तुलनामा बैंकको नाफा ८.०७ प्रतिशतले बढेको हो।
अपरिष्कृत वित्तीय विवरण अनुसार बैंकको वितरणयोग्य नाफा ३२ करोड ३७ लाख ६९ हजार रुपैयाँ रहेको छ।
बैंकले खुद नाफाबाट राष्ट्र बैंकको व्यवस्था बमोजिम बैंकले बैधानीक जगेडा कोषमा १३ करोड ५२ लाख र नियामकीय जगेडा अन्तर्गत २० करोड ८४ लाख रुपैयाँ व्यवस्थापन गरेको हो।
चुक्ता पूँजी ४ अर्ब ३२ करोड ४९ लाख ८९ हजार रुपैयाँ रहेको बैंकको वार्षिक प्रतिशेयर आम्दानी २१.११ रुपैयाँ रहेको छ। यस अवधिसम्ममा बैंकको जगेडा कोषमा १ अर्ब २ करोड ८१ लाख रुपैयाँ, शेयरधनी कोषमा ३४ करोड ८० लाख ५६ हजार रुपैयाँ र शेयर प्रिमियममा ६ करोड ४० लाख रुपैयाँ सञ्चित छ। बैंकको प्रतिशेयर नेटवर्थ १३३.३० रुपैयाँ र मूल्य आम्दानी अनुपात १४.०३ गुणा छ।
चैत मसान्तसम्मको अवधिसम्ममा बैंकले ५० अर्ब ९४ करोड ७ लाख रुपैयाँ निक्षेप सङ्कलन गरी ४७ अर्ब ५६ करोड ८८ लाख रुपैयाँ कर्जा लगानी गरेको यस बैंकले १ अर्ब ६९ करोड ४४ लाख रुपैयाँ खुद ब्याज आम्दानी गरेको छ। यो गत आर्थिक वर्षको यसै अवधिको तुलनामा ३३ करोड २७६ लाख रुपैयाँ बढी हो। समीक्षा अवधिमा बैंकको सञ्चालन नाफा ६ करोड १२ लाख रुपैयाँ बढेर ९६ करोड ५७ लाख २ हजार रुपैयाँ पुगेको छ।
चैत मसान्तसम्ममा बैंकको खराब कर्जा अनुपात ०.०६ बिन्दुले वृद्धि भई ०.०९ मा पुगेको छ। गत आर्थिक वर्षको चैत महिनासम्ममा ०.०३ प्रतिशत मात्र खराब कर्जा अनुपात थियो। बैंकको कोषको लागत ८.६३ प्रतिशत, आधार दर ११.३९ प्रतिशत र स्प्रेड दर ५.५७ प्रतिशत रहेको छ।
About Us
प्रतिक्रिया