राष्ट्रिय वाणिज्य बैंकको नाफा १५% घट्यो, वितरणयोग्य नाफा ११५ करोड

चालु आर्थिक वर्ष २०७६/०७७ को तेस्रो त्रैमास अर्थात चैत मसान्तसम्ममा राष्ट्रिय बाणिज्य बैंकको खुद नाफा १५ प्रतिशत भन्दा धेरैले घटेको छ ।

चालु आर्थिक वर्षको चैतसम्ममा बैंकले ३ अर्ब ३ करोड ६२ लाख रुपैयाँ खुद नाफा आर्जन गरेको छ । बैंकको यो नाफा गत आर्थिक वर्षको सोही अवधिको तुलनामा १५.२५ प्रतिशतले थोरै हो ।

गत आर्थिक वर्षको चैतसम्ममा बैंकले ३ अर्ब ४९ करोड ९३ लाख रुपैयाँ खुद नाफा गरेको थियो । चालु आर्थिक वर्षको चैतसम्ममा बैंकको खुद ब्याज आम्दानीमा उच्च गिरावट आएपछि नाफा घटेको हो । विश्वभरी माहामारीको रुपमा फैलिएको कोरोना भाइरसको संक्रमण फैलिन नदिनका लागि सरकारले नेपालमा पनि लकडाउन गरेको अवस्था छ ।

सरकारले चैत ११ देखि लकडाउन गरेको अझै पनि कायम छ । बैंकहरुले त्रैमासको अन्तिम समयमा कर्जा तथा ब्याज उठाउन पर्ने समयमा लकडाउन भएको अवस्था र समग्र अर्थतन्त्र नै ठप्प भएकाले ब्याजदरमा छुट दिनुपर्ने तथा कर्जा तथा ब्याज असुलीको समय थप भएको हुनाले ब्याज आम्दानीमा गिरावट आएको हो ।

गत आर्थिक वर्षको चैतसम्मको तुलनामा चालु आर्थिक वर्षको चैतमसान्तसम्ममा बैंक कस्ट अफ फण्ड करिब दोब्बरले बढेको छ भने आधार ब्यादर घटेको छ । तर, बैंकको निक्षेप तथा कर्जाको ब्याजदर अन्तरमा भने कुनै परिवर्तन आएको छैन । चालु आर्थिक वर्षको चैत्रसम्ममा बैंकको स्प्रे रेट ४.७० प्रतिशत रहेको छ । यो रेट नेपाल राष्ट्र बैंकले तोकेभन्दा केही माथि हो ।

चालु आर्थिक वर्षको चैतसम्ममा बैंकको शेयरधनीलाई वितरण गर्न योग्य नाफा एक अर्ब १५ करोड ८१ लाख रुपैयाँ रहेको छ । बैंकको चालु आर्थिक वर्षको सो अवधिमा खुद ब्याज आम्दानी ५.८४ प्रतिशतले घटेको छ भने फि तथा कमिसन आम्दानी भने ७.७७ प्रतिशतले बढेको छ । बैंकको ब्याज आम्दानी आएको गिरावटले खुद नाफा घटेको हो । यस अवधिमा बैंकको कर्मचारी खर्च करिब एक करोड ७ लाख रुपैयाँले घटेको छ ।

चालु आवको चैतसम्ममा बैंकले ६ अर्ब ९७ करोड रुपैयाँ खुद ब्याज आम्दानी गरेको छ । त्यसैगरी बैंकले सो अवधिमा ४४ करोड ७६ लाख रुपैयाँ फि तथा कमिसन आम्दानी गरेको छ । चालु आवको चैतसम्ममा बैंकको निक्षेप २ खर्ब ४५ करोड रुपैयाँ रहेको छ भने कर्जा एक खर्ब ४८ अर्ब रुपैयाँ रहेको छ ।

चालु आवको चैतसम्ममा बैंक नाफा घटेपछि प्रतिशेयर आम्दानी पनि घटेको छ। चालु आवको ९ महिनामा बैंकको प्रतिशेयर आम्दानी ४४.९६ रुपैयाँ रहेको छ । गत आर्थिक वर्षको चैतसम्ममा बैंकको प्रतिशेयर आम्दानी ५१.८१ रुपैयाँ थियो ।

चालु आवको चैतसम्ममा बैंकको खराब कर्जा केही बढेको छ । गत आर्थिक वर्षको चैतसम्ममा बैंकको खराब बर्जा ४.२८ प्रतिशत रहेकोमा चालु आवको सोही अवधिमा ४.६४ प्रतिशत पुगेको छ । चैतसम्ममा बैंकको आधार ब्याजदर भने बढेर ६.७२ प्रतिशतमा पुगेको छ । गत आर्थिक चैतसम्ममा बैंकको आधार ब्याजदर ५.३८ प्रतिशत रहेको थियो ।