नक्कली प्रमाणपत्रबाट विद्युत प्राधिकरण जागिर खाने इलेक्ट्रिसियन विरुद्ध भ्रष्टाचार मुद्दा

अख्तियार दुरुपयोग अनुसन्धान आयोगले शैक्षिक योग्यताको नक्कली (झुठ्ठा) प्रमाणपत्र पेश गरि गरि नेपाल विद्युत प्राधिकरण, कुलेखानी दोस्रो (निबुवाटार) हेटौडामा कार्यरत इलेक्ट्रिसियन रत्न बहादुर थिङ्ग उपर विशेष अदालत, काठमाडौंमा मुद्दा दायर गरेको छ ।

थिङ्गले आधुनिक राष्ट्रिय माध्यमिक विद्यालय हेटौंडाबाट कक्षा ८ उत्तीर्ण गरेको झुठ्ठा एवं नक्कली प्रमाणपत्र पेश गरी तह १ कुल्ली र जुनियर हेल्पर पदमा स्थायी नियुक्ति लिई सोही प्रमाणपत्रका आधारमा तह २ हेल्पर पद तथा तह ३ इलेक्ट्रिसियन पदमा समेत बढुवा भई सेवामा बहाल रही लाभ लिएको देखिएकोले भ्रष्टाचार मुद्दामा कारवाही प्रकृया अगाडि बढाइएको छ।

उनको उक्त कार्य भ्रष्टाचार निवारण ऐन, २०१७ को दफा १२ र भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर देखिएकोले थिङ्गलाई भ्रष्टाचार निवारण ऐन, २०१७ को दफा १२ र दफा २९ (२) तथा भ्रष्टाचार निवारण ऐन, २०५९ को दफा १६ को उपदफा (१) बमोजिमको कैद र जरिवानाको सजाय मागदाबी गरिएको छ।