बुद्धभूमी हाइड्रोले १२ करोड बराबरको आईपिओ निष्कासन गर्ने

बुद्धभूमी नेपाल हाइड्रोपावर कम्पनी लिमिटेडले आईपिओ निष्कासनको प्रस्ताव राखेर असार २६ गते कम्पनीको बाह्रौं वार्षिक साधारण सभा आह्वान गरेको छ।

कम्पनीको साधारण सभा कम्पनिको रिष्जट्रार कार्यालय महाराजगंजमा बेलुका ३ बजे बस्नेछ। उक्त साधारण सभाले १२ करोड रुपैयाँ बराबरको १२ लाख कित्ता प्राथमिक शेयर निष्कासनको प्रस्ताव पनि पारित गर्नेछ। जसमध्ये ४ लाख कित्ता आयोजना प्रभावित क्षेत्रका बासिन्दाका लागि छुट्याएको छ ।

साथै कम्पनीले आर्थिक वर्ष २०७५/७६ को वार्षिक प्रतिवेदन पारित गर्ने, र आर्थिक वर्ष २०७६/७७ को लागि लेखापरिक्षक नियुक्ति र पारिश्रमिक निर्धारण गर्ने लगायतका एजेण्डा पारित गर्नेछ ।

हाल कम्पनीको चुक्ता पूँजी २८ करोड रहेको छ र उक्त शेयर निष्काशन पश्चात कम्पनीको चुक्ता पूँजी ४० करोड कायम हुनेछ भने संस्थापक शेयर स्वामित्व ७० प्रतिशत र सर्वसाधारणको शेयर स्वामित्व ३० प्रतिशत रहने छ ।

बुद्धभूमि नेपाल हाइड्रोपावर कम्पनीले नुवाकोट जिल्लाको दुप्चेश्वर गाउँपालिका समुन्द्रटार स्थित तादी खोलामा रन अफ रिभरमा आधारित ५ मेगावाट क्षमताको जलविद्युत्त आयोजना निर्माण गरिरहेको छ ।