पछिल्लो २४ घण्टामा १५० जनामा कोरोना भेटियो, ६०९ जना डिस्चार्ज

नेपालमा पछिल्लो २४ घण्टामा थप १५० जनामा कोरोना संक्रमण देखिएको छ ।

स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले देशभरका परीक्षण केन्द्रमा गरिएको परीक्षणमा थप १५० जनाको पीसीआर रिपोर्ट पोजिटिभ देखिएको बताए।

स्वास्थ्य तथा जनसंख्या मन्त्रालयका अनुसार मंगलबारसम्म कोरोना भाइरस संक्रमितको संख्या १७ हजार ९९४ पुगेको छ । पछिल्लो २४ घण्टामा २७ परीक्षण केन्द्रमा ३ हजार ९६३ जनाको पीसीआर परीक्षण गरिएको थियो।

त्यस्तै मंगलबार ६०९ जना डिस्चार्ज भएका छन । डिस्चार्ज हुनेको संख्या हालसम्म १२ हजार ४७७ पुगेको छ । यो कुल संक्रमितको ६९.३४ प्रतिशत हो।

प्रवक्ता गौतमका अनुसार नेपालमा कोरोनाका कारण अहिलेसम्म ४० जनाको ज्यान गइसकेको छ।