चालु आवको प्रथम त्रैमासिक वित्तीय विवरण प्रकाशन गर्ने फर्स्ट माइक्रोफाइनान्स पहिलो कम्पनी

शेयर बजारमा सूचीकृत २०९ कम्पनीहरुमध्ये फर्स्ट माइक्रोफाइनान्स (FMDBL) चालु आवको प्रथम त्रैमासिक वित्तीय विवरण प्रकाशन गर्ने पहिलो कम्पनी बनेको छ ।

माइक्रोफाइनान्सको चालु आर्थिक वर्षको पहिलो त्रैमासको अपरिष्कृत वित्तीय विवरण २ करोड ९७ लाख १६ हजार रुपैयाँ खुद नाफा आर्जन गरेको छ । जुन गत आवको यसै अवधिको तुलनामा २८ लाख ७८ हजार रुपैयाँ धेरै हो ।

गत आवको पहिलो त्रैमासमा लघुवित्तले २ करोड ६८ लाख रुपैयाँ खुद नाफा आर्जन गरेको थियो ।

ब्यवस्थापकीय क्षमता सबल बनाएर खर्च घटाउँदा लघुवित्तले कोभिड महामारीबीच पनि कम्पनीको लगानीकर्तालाई खुशी तुल्याउने वित्तीय विवरण पस्केको छ ।

लघुवित्त कम्पनीहरुलाई थोक कर्जा प्रवाह गर्ने यस कम्पनीले असोज मसान्तसम्ममा कम्पनीले बैंक तथा वित्तीय संस्थाहरुबाट ५ अर्ब ९४ करोड ८१ लाख ९ हजार रुपैयाँ सापटी लिएर ६ अर्ब ३ करोड १७ लाख ६८ हजार रुपैयाँ कर्जा प्रवाह गरेको छ ।

यसबाट लघुवित्तले ५ करोड २७ लाख ५७ हजार रुपैयाँ खुद ब्याज आम्दानी गरेको छ । जुन अघिल्लो आवको यसै अवधिको तुलनामा १ करोड २ लाख ७७ हजार रुपैयाँ धेरै हो । अघिल्लो आवको तुलनामा ब्याज आम्दानी ४ करोड ८० लाख रुपैयाँले घटेको कम्पनीको ब्याज खर्च पनि ५ करोड ८२ लाख रुपैयाँले घट्दा खुद ब्याज आम्दानीमा भने सुधार भएको छ ।

अघिल्लो आवको पहिलो त्रैमासमा १७ करोड ९२ लाख ब्याज आम्दानी गरेकोमा चालु आवको यसै अवधिमा १३ करोड १२ लाख मात्र आर्जन गरेको छ । यस्तै गत आवमा १३ करोड ६७ लाख ब्याज खर्च गरेको कम्पनीके चालु आवको यसै अवधिमा ब्याजखर्च ७ करोड ८५ लाखमा रहेको छ । यसले लघुवित्तको सम्भावित नोक्सानी व्यवस्थामा क३८ लाख बढ्दापनि नाफामा असर पुगेको छैन ।

अघिल्लो आवको तुलनामा कर्मचारी र प्रशासनिक खर्चमा समेत कटौती गरेपछि लघुवित्तको नाफामा सुधार आएको छ । समीक्षा अवधिमा लघुवित्तको सञ्चालन मुनाफा ४८ लाख १२ हजार रुपैयाँ बढेर ४ करोड ७१ लाख ६८ हजार रुपैयाँ पुगेको छ ।

चुक्ता पूँजी ८७ करोड ६८ लाख ११ हजार रुपैयाँ रहेको फर्स्टले वार्षिक प्रतिशेयर आम्दानी १३ रुपैयाँ ५६ पैसा कायम गरेको छ । लघुवित्तको जगेडा कोषमा १६ करोड ६० लाख रुपैयाँ कायम रहँदा प्रतिशेयर नेटवर्थ ११८.९४ रुपैयाँ रहेको छ । लघुवित्तको खराब कर्जा अनुपात शुन्य प्रतिशत कायम रहँदा मूल्य आम्दानी अनुपात ४१.७५ गुणा कायम भएको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।