चन्द्र ढकाल र प्यानललाई जिताउन गण्डकी प्रदेशमा प्रचारप्रसार समिति गठन

नेपाल उद्योग वाणिज्य महासंघको ५४ औं वार्षिक साधारण सभा तथा निर्वाचनमा वरिष्ठ उपाध्यक्षका उम्मेदवार चन्द्र ढकाल र उनको प्यानललाई जिताउन गण्डकी प्रदेशमा ५१ सदस्यीय प्रचार–प्रसार समिति गठन गरेको छ ।

गण्डकी प्रदेशका अध्यक्ष संजीवबहादुर कोइरालाको संयोजकत्वमा सो प्रदेशका सबै जिल्ला नगरका अध्यक्ष तथा पूर्व अध्यक्षहरुसहित समिति गठन भएको हो ।

आगामी निर्वाचनमा वरिष्ठ उपाध्यक्षका उम्मेदवार ढकाल, जिल्ला नगरतर्फका उपाध्यक्ष उम्मेदवार गुणनिधि तिवारी र जिल्ला नगर तथा प्रदेशबाट प्रतिनिधित्व गर्ने केन्द्रीय सदस्यहरुलाई निर्वाचित गराउन चुनाव प्रचारप्रसार कमिटि गठन गरिएको संयोजक कोइरालाले जानकारी दिए ।

‘अहिले म म्याग्दीमा आइपुगेको छु, हामीले समिति नै गठन गरेर चुनाव प्रचार तीव्र बनाएका छौं’ कोइरालाले भने, ‘सबै अध्यक्षहरुको आग्रहमा समिति बनाइएको हो, कसरी हुन्छ ढकाल प्यानललाई हामी जिताउने अभियानमा छौं ।’

गण्डकी प्रदेशले यसअघि नै ढकाल प्यानललाई बिजयी गराउन सर्वसम्मत निर्णय समेत गरिसकेको छ ।

समितिमा नेपाल उद्योग वाणिज्य महासंघ गण्डकी प्रदेश कार्यसमितिका ११ जना, गण्डकी प्रदेश भित्रका २० वटा उद्योग वाणिज्य संघका अध्यक्षहरु र पूर्व अध्यक्षहरु गरी जम्मा ५१ सदस्यीय कार्यसमिति गठन गरेको हो ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।