युनिलिभरमा इन्साइडर ट्रेडिङ्गको आशंका, रिर्पोट अगावै उचालियो मूल्य

युनिलिभर नेपाल लिमिटेड (UNL) ले चालु आवको तेस्रो त्रैमासमा गत आर्थिक वर्षको यसै अवधिको भन्दा व्यापार तथा नाफामा उल्लेखीय सुधार गरेको वित्तीय विवरण सार्वजनिक गरेको छ ।

कम्पनीले चालु आर्थिक वर्षको तेस्रो त्रैमासमा ३२ करोड १६ लाख रुपैयाँ नाफा कमाएको छ । जबकी गत आवको यसै अवधिको कम्पनी ७ करोड ६३ लाख नोक्सानमा थियो।

समीक्षा अवधिमा कम्पनीले उत्पादन बिक्री गरेर एक अर्ब ७३ करोड ५३ लाख रुपैयाँ आम्दानी गरेको छ । जबकी गत आवको यसै अवधिमा कम्पनीले एक अर्ब ७ करोड आम्दानी गरेको थियो । कम्पनीको अन्य स्रोतबाट ८१ लाख आम्दानी गरेको छ । कम्पनीले यस अवधिमा एक अर्ब ३२ करोड कुल खर्च गरेको छ ।

९ करोड २१ लाख रुपैयाँ चुक्तापुँजी रहेको कम्पनीको जगेडा कोषमा २ अर्ब ३६ करोड रुपैयाँ छ । सूचीकृत कम्पनीमध्ये सबैभन्दा बढी शेयर मूल्य भएको कम्पनीको शेयर मूल्य प्रतिकित्ता २१ हजार ४३० रुपैयाँ छ । कम्पनीको प्रतिशेयर आम्दानी ५६९ रुपैयाँ, कम्पनीको प्रतिशेयर नेटवर्थ २ हजार ६६६ रहेको छ।

दोस्रो बजारमा पछिल्लो दुई दिनमा युनिलिभरको शेयरमूल्य उच्च दरमा बढेको छ । रिर्पोट सार्वजनिक गर्नु अगाडि एक्कासी शेयर मूल्यमा भएको बढोत्तरीले इन्साइडर ट्रेडिङ्ग भएको अनुमान गर्न सकिन्छ । बुधबार युनिलिभरको शेयर मूल्य सर्किट लेभलमा बढेको थियो भने मंगलबार पनि उच्चदरले बढेको थियो ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।