निर्जीवन बीमकको पाँच महिनाकाे व्यवसायः शिखर शीर्ष स्थानमा रहँदा सानिमा जनरल पुछारमा

नेपालमा सञ्चालित २० वटा निर्जीवन बीमा कम्पनीहरुले २७.३९ प्रतिशतले आफ्नो व्यवसाय विस्तार गरेका छन् ।

बीमा समितिले उपलब्ध गराएको तथ्याङ्क अनुसार मंसिर महिनासम्ममा निर्जिवन बीमा कम्पनीहरुले १५ अर्ब ४२ करोड ६९ लाख ९ हजार रुपैयाँ कुल बीमा शुल्क आर्जन गरेका छन् । जसमध्ये मंसिर महिनामा मात्रै कम्पनीहरुले २ अर्ब ८४ करोड ४१ लाख ५ हजार रुपैयाँ कुल बीमा शुल्क आर्जन गरेका छन् ।

गत आवको यसै अवधिमा निर्जीवन बीमा कम्पनीहरुले १२ अर्ब ११ करोड रुपैयाँ कुल बीमा शुल्क आर्जन गरेका थिए ।

विसं २०७८ मंसिरसम्ममा संकलित कुल बीमाशुल्कमध्ये शिखर इन्स्योरेन्स कम्पनीले सबैभन्दा धेरै १६७.७७ करोड बीमाशुल्क संकलन गरेको छ भने सबैभन्दा कम सानिमा जनरल इन्स्योरेन्सले ३७.४२ करोड रुपैयाँ संकलन गरेको छ ।

यस अवधिमा सगरमाथा इन्स्योरेन्स, नेको इन्स्योरेन्स, सिद्धार्थ इन्स्योरेन्स र एनएलजी इन्स्योरेन्स कम्पनीले १०० करोड माथि बीमा शुल्क संकलन गरेको छ ।

मंसिरसम्ममा १२ वटा निर्जीवन बीमा कम्पनीकाहरुले ५० करोडदेखि १०० करोडसम्म बीमाशुल्क संकलन गरेका छन् भने ५० करोडभन्दा कम कुल बीमाशुल्क संकलन गर्ने कम्पनीको संख्या ३ रहेको छ ।

यस अवधिमा प्रिमियर इन्स्योरेन्स, यूनाइटेड इन्स्योरेन्स, हिमालयन जनरल इन्स्योरेन्स, अजोड इन्स्योरेन्स, आइएमई जनरल इन्स्योरेन्स, नेपाल इन्स्योरेन्स, प्रभु इन्स्योरेन्स, लुम्बिनी जनरल इन्स्योरेन्स, ओरिएण्टल इन्स्योरेन्स कम्पनी, राष्ट्रिय बीमा कम्पनी, प्रुडेन्सियल इन्स्योरेन्स र एभरेष्ट इन्स्योरेन्सले ५० करोडभन्दा माथि १०० करोडभन्दा कम कुल बीमाशुल्क संकलन गरेका छन् ।

यस अवधिमा जनरल इन्स्योरेन्स, नेशनल इन्स्योरेन्स कम्पनी र सानिमा जनरल इन्स्योरेन्स कम्पनीले ५० करोडभन्दा कम कुल बीमा शुल्क आर्जन गरेका छन् ।

मंसिरमा कुल २८४ करोड बीमाशुल्क संकलन

निर्जीवन बीमा कम्पनीहरुले चालु आर्थिक वर्षको पाँचौं महिना अर्थात मंसिरमा २ अर्ब ८४ करोड ४१ लाख ४ हजार रुपैयाँ कुल बीमाशुल्क संकलन गरेका छन् ।

यस अवधिमा शिखर, नेको, सगरमाथा, र सिद्धार्थ इन्स्योरेन्सले २० करोडभन्दा बढी कुल बीमाशुल्क संकलन गरेका छन् । एनएलजी, नेपाल इन्स्योरेन्स, अजोड, लुम्बिनी, युनाइटेड, प्रिमियर, आईएमई जनरल, हिमालयन जनरल र प्रभु इन्स्योरेन्सले मंसिरमा १० करोडभन्दा धेरै बीमाशुल्क संकलन गरेका छन् ।

ओरियन्टल इन्स्योरेन्स, प्रुडेन्सियल, एभरेष्ट, सानिमा जनरल इन्स्योरेन्स, जनरल इन्स्योरेन्स, राष्ट्रिय बीमा कम्पनी र नेशनल इन्स्योरेन्सले मंसिरमा १० करोडभन्दा कम कुल बीमाशुल्क उठाएका छन् । मंसिरमा सबैभन्दा कम बीमाशुल्क संकलन गरेको नेशनल इन्स्योरेन्सले ५.४२ करोड बीमाशुल्क संकलन गरेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।