हेभी इक्यूपमेन्टको बिक्रेता भुसाल बिजनेस हाउसको यो वर्षको कारोबार ६२ करोड बढी

भुसाल ग्रुप प्रवद्धक रहेको भुसाल बिजनेस हाउसको सन् २०२२ को जुलाई सम्मको सञ्चालन आम्दानी ६२ करोड २० लाख रहेको छ । हाउसको सो आम्दानी हेभी इक्यूपमेन्टहरुको बिक्री मार्फत भएको हो ।

यस अघि सन् २०२१ मा कम्पनीको लेखापरीक्षण भएको विवरण अनुसारको सञ्चालन आम्दानी १८ करोड ९० लाख रहेको थियो । सन् २०२२ को जुलाई सम्ममा नै राम्रो आम्दानी गरिरहेको भुसाल बिजनेस हाउसको वित्तीय सूचांकहरुमा सकरात्मक सुधार आएको छ ।

सन् २०२२ को सञ्चालन आम्दानी लेखापरिक्षण नभएको विवरण भएपनि २०२१ को लेखापरिक्षण भएको विवरणका आधारमा देखिएको आम्दानीको तीन गुणा धेरै हो । ब्याकहु लोडरको आधिकारिक बिक्रेता रहेको भुसाल बिजनेस हाउसले न्यू होल्यान्डका निर्माण साधन, कृषि उपकरण र हेभी इक्यूपमेन्टहरुको नेपालभर बिक्री वितरण गर्दै आएको छ ।

सन् २०२० मा स्थापना भएको यो कम्पनीको प्रवद्र्धक भुसाल ग्रुप रहेको छ भने यसको नेतृत्व बालकृष्ण भुसालले गरेका छन् । सन् २०२० मा स्थापना भएता पनि न्यु होल्यान्डको ब्रान्ड र यसले उत्पादन गर्ने विविध कृषि उपकरण देखि हेभी इक्यूपमेन्टका कारण स्थापनाको दुई वर्षमै राम्रो आम्दानी गर्न सफल भएको छ ।

सन् २०२१ को परिष्कृत विवरण अनुसार कम्पनीका सेयर धनीको पुँजी र कर्जाको अनुपात (गियरिङ रेसियो) ५.४० गुणा रहेको छ । यसैगरी सन् २०२२ को उक्त अनुपात २.७४ रहेको छ । यसका साथै सन् २०२२ को अमोर्टाइजेसन, डिप्रिसियसन, ब्याज र कर अघिको आम्दानी कुल सञ्चालन आम्दानी ५.७९ प्रतिशत रहेको छ । यस अघि २०२१ मा उक्त प्रतिशत ४.१६ रहेको थियो ।

यसै क्रममा क्रेडिट रेटिङ एजेन्सी इन्फोमेरिक्स नेपालले ८५ करोड अल्पकालीन ऋणका लागि भुसाल बिजनेस हाउसलाई ए४ रेटिङ प्रदान गरेको छ ।

समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।