एनएमबि बैंकको खुद ब्याज आम्दानी बढेपनि घट्यो खुद नाफा

एनएमबि बैंक लिमिटेड (NMB) को खुद ब्याज आम्दानी ४४.४६ प्रतिशतले बढेपनि बैंकको खुद नाफा भने समीक्षा अवधिमा गत आवको तुलनामा १३.४३ प्रतिशतले घटेको छ ।

चालु आर्थिक वर्षको पहिलो त्रैमासको अपरिष्कृत वित्तीय विवरण अनुसार बैंकले ९० करोड ४१ लाख ३४ हजार रुपैयाँ खुद नाफा आर्जन गरेको छ । अघिल्लो आवको सोही अवधिमा १ अर्ब ४ करोड ४४ हजार रुपैयाँ खुद नाफा आर्जन गरेको थियो ।

एनएमबिको नाफा घटेपनि वितरणयोग्य मुनाफामा भने उछाल आएको छ । बैंकको वितरणयोग्य मुनाफा ४५ करोड ८४ लाख रुपैयाँबाट ३८७ प्रतिशतको उच्च वृद्धि हुँदै २ अर्ब २३ करोड ३१ लाख ७४ लाख रुपैयाँ पुगेको छ ।

चुक्ता पुँजी १८ अर्ब ३६ करोड ६७ लाख ६ हजार रुपैयाँ रहेको बैंकको वार्षिक प्रतिसेयर आम्दानी २२.७५ रुपैयाँबाट घटेर १९.६९ रुपैयाँमा झरेको छ । यस्तै जगेडा कोष ६ अर्ब ४६ करोड रुपैयाँबाट ६.५४ प्रतिशतले बढेर ६ अर्ब ८८ करोड रुपैयाँ सञ्चित भएको छ ।

पहिलो त्रैमासमा बैंकले १ खर्ब ८० अर्ब ६९ करोड ६२ लाख रुपैयाँ निक्षेप संकलन गरी १ खर्ब ७८ अर्ब ७१ करोड ३७ लाख रुपैयाँ कर्जा लगानी गरेको छ । गत आवको अन्त्यसम्ममा बैंकले १ खर्ब ८४ अर्ब ८१ करोड ७१ लाख रुपैयाँ निक्षेप संकलन गरी १ खर्ब ७५ अर्ब ६२ लाख रुपैयाँ कर्जा लगानी गरेको थियो ।

यस त्रैमासमा बैंकले २ अर्ब ५ करोड ४२ लाख ८० हजार रुपैयाँ खुद ब्याज आम्दानी र १ अर्ब २९ करोड १९ लाख ३५ हजार रुपैयाँ सञ्चालन मुनाफा आर्जन गरेको छ । गत आवको सोही अवधिको तुलनामा बैंकले खुद ब्याज आम्दानी ४४.४६ प्रतिशतले वृद्धि गर्दा सञ्चालन मुनाफा १२.१२ प्रतिशतले घटेको छ ।

बैंकको खराब कर्जाको अनुपात १.८५ प्रतिशतबाट बढेर १.९० प्रतिशत पुगेको छ । बैंकको प्रतिसेयर नेटवर्थ १५१.६० रुपैयाँ, कस्ट अफ फण्ड ८.०२ प्रतिशत, सीडी रेसियो ८६.९४ प्रतिशत, स्प्रेडदर ३.७९ प्रतिशत, पीई रेसयो ११.९३ गुणा, आधारदर १०.१५ प्रतिशत छ । बैंकको प्रतिसेयर कुल सम्पत्ति मूल्य १४१४ रुपैयाँ रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।