प्रभु बैंकको लाभांश घोषणा, एक अर्ब एक करोड बाँड्ने

प्रभु बैंक लिमिटेडले गत आर्थिक वर्ष २०७७।७८ को वितरण योग्य मुनाफाबाट सेयरधनीहरुलाई एक अर्ब १ करोड ६६ लाख ९६ हजार ३३३ रुपैयाँ लाभांश वितरण गर्ने लाभांश प्रस्ताव गरेको छ ।

बैंक सञ्चालक समितिको मंसिर १ गते बिहीबार सम्पन्न बैठकले बैंकको हाल कायम चुक्ता पुँजीको ६.५० प्रतिशत ( ८२ करोड ६० लाख ६५ हजार ७७१ रुपैयाँ ३८ पैसा) बोनस सेयर र बोनसमा लाग्ने कर प्रयोजनार्थ सहित १.५० प्रतिशत नगद (१९ करोड ६ लाख ३० हजार ५६२ रुपैयाँ) लाभांश गरी कुल ८ प्रतिशत लाभांश वितरण गर्ने प्रस्ताव गरेको हो ।

बैंक सञ्चालक समितिको बैठकले प्रस्ताव गरेको सो लाभांश नेपाल राष्ट्र बैंकबाट स्वीकृत भई बैंकको आगामी वार्षिक साधारण सभाले पारित गरेपश्चात मात्र लगानीकर्तामा वितरण हुनेछ ।

हाल १२ अर्ब ७० करोड ८७ लाख ४ हजार १७५ रुपैयाँ चुक्ता पुँजी रहेको बैंकको प्रस्तावित बोनस सेयर वितरणपछि १३ अर्ब ५३ करोड ४७ लाख ६९ हजार ९४६ रुपैयाँ पुग्नेछ । प्रभु बैंकले १ः१ अनुपातमा सेञ्चुरी बैंकलाई प्राप्ती गर्ने सम्झौता समेत गरेको छ ।

अघिल्लो आव २०७७/७८ बाट प्रभु बैंकले चुक्ता पुँजीको १२ प्रतिशत बोनस सेयर र कर प्रयोजनका लागि ०.६३ प्रतिशत नगद लाभांश वितरण गरेको थियो । अघिल्लो आवको तुलनामा बैंकले ४.६३ प्रतिशत थोरै लाभांश वितरण गर्ने प्रस्ताव गरेको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।