राष्ट्र बैंकले ट्रेजरी बिल्सको सोझै खरिद गरी २० अर्ब बजारमा पठाउँदै

नेपाल राष्ट्र बैंकले २० अर्ब रुपैयाँ बराबरको ट्रेजरी बिल्स सोझै खरिद गर्ने भएको छ । केन्द्रीय बैंकले बैंक वित्तीय संस्थासँग भएको सरकारी ऋणपत्रको खरिद गरेर बजारमा पैसा पठाउने प्रक्रिया अघि बढाएको हो ।

केन्द्रीय बैंक मौद्रिक व्यवस्थापन विभागका अनुसार बैंकले मंसिर ९ गते शुक्रबार ट्रेजरी बिल्स सोझै खरिद गर्नेछ । त्यसका लागि बिहीबार बोलकोबल गर्ने भएको छ । इच्छुक बैंक तथा वित्तीय संस्थाले बिहीबार दिउँसो ३ बजेसम्म अनलाइन माध्यमबाट बोलकबोल गर्न सक्नेछन् । बैंक वित्तीय संस्थाले २०७९ चैतसम्म भुक्तानी अवधि भएको ट्रेजरी बिल्स मात्र केन्द्रीय बैंकलाइ बिक्री गर्न सक्छन ।

काउन्टरपार्टीले बिक्री गर्न चाहेको तोकिएको भुक्तानी मिति भएका नेपाल सरकारका ट्रेजरी बिल्सको सिरिज नम्बर र परिणाम उल्लेख गर्नुपर्नेछ । यस्तै बिक्री गर्न चाहेको ट्रेजरी बिल्सको परिमाणको मूल्यमा बोलकबोल गर्नुपर्नेछ ।

यसैगरी काउन्टरपार्टीले बिक्री गर्न चाहेको नेपाल सरकारको ट्रेजरी बिल्सको परिमाण ५ करोड वा ५ करोडले भाग लाग्ने दरले खरिद आह्वान गरेको रकमसम्म बोलकबोल गर्न सक्नेछन् । तर, एउटा सिरिजको ट्रेजरी बिल्सका लागि एउटामात्र बोलकबोल गर्नुपर्नेछ ।

काउन्टरपार्टीले बिक्री गर्न चाहेको नेपाल सरकारको ट्रेजरी बिल्स सबैभन्दा कम बोलमूल्य क्रमका आधारमा बहुमूल्यमा राष्ट्र बैंकले खरिद गर्न सक्नेछ । सोझै खरिद बोलकबोलको रकम बाँडफाँड गर्दा बोलबमोजिमको वार्षिक प्रतिफल दर यिल्डरेट गणना गरी सबैभन्दा बढी प्रतिफलदर बोल गर्ने काउण्टरपार्टीलाई प्राथमिकता क्रममा राखी आव्हान गरेको रकमसम्म क्रमश बाँडफाँड गरिने केन्द्रीय बैंकले जनाएको छ ।

तर समान वार्षिक प्रतिफल दर भएका बोलपत्रहरूको रकम समावेश गर्दा कुल निष्काशित रकमभन्दा बढी भएमा सो दरको बोल रकमलाई समानुपातिक रूपमा बाँडफाँड गर्ने राष्ट्र बैंकले जनाएको छ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।