आजदेखि कोरोना दाबी भुक्तानी सुरु, कुन कम्पनीले कति गर्दैछन् भुक्तानी ? (विवरण सहित)

निर्जीवन बीमा कम्पनीहरुले आजदेखि कोरोना बीमा दाबी बापतको रकम भुक्तानी गर्न सुरु गरेका छन् । नेपाल बीमा प्राधिकरणको निर्देशन बमोजिम कम्पनीहरुले मंगलबारदेखि बीमा रकम भुक्तानी गर्न सुरु गरेका हुन् ।

पहिलो चरणमा कम्पनीहरुले १ अर्ब ८१ करोड रुपैयाँ भुक्तानी गर्नेछन् । तर, नेपाल पुनर्बीमा कम्पनीले भुक्तानी गर्नुपर्ने १२ प्रतिशत अर्थात् २१ करोड २१ लाख रुपैयाँ नेपाल बीमक संघमा आइनसकेको संघका महासचिव एवं नेको इन्स्योरेन्सका प्रमुख कार्यकारी अधिकृत अशोक खड्काले बताए । उनका अनुसार प्राधिकरणले नेपाल पुर्नबीमा कम्पनीको हिस्सापछि थप हुने गरी भुक्तानी गर्न आग्रह गरेको बताए ।

नेपाल बीमक संघका अनुसार कम्पनीहरुले १८ हजार ६० वटा पोलिसीको दाबी रकम भुक्तानी गर्नेछन् । यो भनेको व्यक्ति तथा परिवार नामको पोलिसी मात्रै हो । कम्पनीहरुमा परेको कुल दाबी पोलिसी संख्यामध्ये २५ हजार ८४ व्यक्ति तथा परिवारको पोलिसी रहेको संघको तथ्यांकमा छ । जसमध्ये हाल संकलन भएको रकमबाट ७२ प्रतिशत पोलिसीको मात्रै भुक्तानी गरिने संघको बताएको छ ।

संघका अनुसार निर्जीवन बीमा कम्पनीमध्ये पनि चार वटा कम्पनीले मात्रै आफ्नो हिस्साको रकम संघलाई हस्तान्तरण गरेका छन् । जसमध्ये नेशनल, नेको, प्रिमियर, ओरियण्टल र प्रिमियर इन्स्योरेन्स हुन् । आफनो हिस्साको रकम उपलब्ध नगराउने कम्पनीलाई सो रकम घटाई संघले चेक मार्फत भुक्तानी रकम हस्तान्तरण गरेको छ ।

संघका अनुसार यो पटक राष्ट्रिय बीमा कम्पनीले १ हजार ८६३ वटा पोलिसीको दाबी भुक्तानी गर्नेछ । जसका लागि संघले कम्पनीलाई १५ करोड ३६ लाख रुपैयाँ हस्तान्तरण गरेको छ । सो रकममा कम्पनीले आफनो हिस्साको दुई करोड २७ लाख रुपैयाँ थप गर्नुपर्नेछ भने नेपाल पुनर्बीमा कम्पनीबाट रकम भुक्तानी भएपछि १ करोड १८ लाख रुपैयाँ थप हुनेछ ।

त्यस्तै, सगरमाथा इन्स्योरेन्स कम्पनीले १ हजार ५४२ वटा पोलिसीको दाबी भुक्तानी गर्नेछ । जसका लागि संघबाट कम्पनीले १७ करोड ९४ लाख रुपैयाँ प्राप्त गरेको छ । त्यस्तै, कम्पनीले पनि आफ्नो हिस्साको रकम थप गर्नुपर्नेछ भने १ करोड १८ लाख रुपैयाँ पाउने छ ।

नेको इन्स्योरेन्सले १ हजार ६६५, हिमालयन जनरल इन्स्योरेन्सले १ हजार २५९, अजोड इन्स्योरेन्ले १ हजार ३५५ वटा पोलिसीको भुक्तानीको गर्नेछ भने शिखर इन्स्योरेन्सले सबैभन्दा धेरै ३६१४ वटा पोलिसीको दाबी भुक्तानी गर्नेछ ।

अर्थमन्त्रालयको निर्देशन बमोजिम कम्पनीहरुले राष्ट्रसेवक, सरकारी कर्मचारी र संघ संस्थाबाट भएका बीमा दाबीको भने अहिले भुक्तानी गर्नेछैन ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।