सामाजिक सुरक्षा कोषमा आबद्ध हुन चाहने विदेशमा रहेका नेपाली कामदारले ३१९९ रुपैयाँ योगदान गर्नुपर्ने

नेपाल सरकारले सञ्चालन गरेको सामाजिक सुरक्षा कोषमा जोडिन चाहने वैदेशिक रोजगारीमा रहेका नेपाली कामदार वा विदेशमा स्वरोजगारमा रहेका व्यक्तिले ३१९९ रुपैयाँ योगदान गनुपर्ने भएको छ ।

श्रम, रोजगार तथा सामाजिक सुरक्षा मन्त्रालयले वैदेशिक रोजगारमा रहेका श्रमिक र विदेशमा स्वरोजगारमा रहेका व्यक्तिको लागि योगदानमा आधारित सामाजिक सुरक्षा योजना सञ्चालन कार्यविधि २०७९ पारित गर्दै यस्तो व्यवस्था गरेको हो ।

यो योजना आगामी बैशाखदेखि सुरु हुने श्रम मन्त्री शेर बहादुर कुँवरले बताए । प्राविधिक तयारीको लागि ९० दिन राखिएको श्रम मन्त्री कुँवरले जानकारी दिए ।

श्रम मन्त्रालयले गत मंसिर ११ गते नै यो योजना घोषणा गर्ने तयारी गरेको थियो । तर, प्रतिनिधि सभा निर्वाचनका लागि मन्त्री कुँवर व्यस्त भएपछि घोषणाको प्रक्रिया लम्बिएको हो । यद्यपी सामाजिक सुरक्षा कोषले मंगलबार एक कार्यक्रमको आयोजना गरी औपचारिक रुपमा घोषणा गर्ने भएको छ ।

मन्त्रालयले पारित गरेको कार्यविधि अनुसार वैदेशिक रोजगारीमा रहेका नेपाली श्रमिक वा विदेशमा स्वरोजगारीमा रहेका व्यक्तिले नेपाल सरकारले तोकेको न्यूनतम आधारभूत पारिश्रमिकको २१.३३ प्रतिशत रकम योगदान गर्नुपर्ने भएको छ ।

नेपाल सरकारले औद्योगिक क्षेत्रको कामदारको न्यूनतम आधारभूत पारिश्रमिक १५ हजार रुपैयाँ तोकेको छ । जसमध्य ९ हजार ८९५ पारिश्रमिक र पाँच हजार १०५ रुपैयाँ भता तोकिएको छ । पारिश्रमिक वृद्धि भएसँगै योगदान रकम पनि बढ्नेछ ।

कार्यविधि अनुसार श्रमिकले गर्ने योगदान रकममध्ये दुर्घटना तथा अशक्तता सुरक्षा योजना र आश्रित परिवार सुरक्षा योजनाको लागि ७.४८ प्रतिशत रकम विनियोजन गरिनेछ । वृद्ध अवस्था सुरक्षा योजनामा १३.२५ प्रतिशत रकम विनियोजन गरिएको छ ।

वैदेशिक रोजगारमा रहेको श्रमिक वा विदेशमा स्वरोजगारमा रहेका व्यक्तिले योजनामा औद्योगिक क्षेत्रका श्रमिकको लागि तोकेको न्यूनतम आधारभूत पारिश्रमिकको बढीमा तीन गुणासम्म योगदान गर्न सक्नेछन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।