पहिलो चरणमा १३ हजार बीमितले पाए कोरोना बीमा दाबी रकम

निर्जीवन बीमा कम्पनीहरुले भुक्तानी गर्न बाँकी रहेको कोरोना बीमा दाबी रकममध्ये पहिलो चरणमा हालसम्म १३ हजार १९९ बीमितको दाबी रकम भुक्तानी गरेका छन् ।

कम्पनीहरुले गत आइतबारसम्ममा सो संख्याको पोलिसी बापत एक अर्ब १२ करोड रुपैयाँ भुक्तानी गरेका हुन् । अर्थमन्त्रालयले कोरोना बीमा दाबी भुक्तानीका लागि एक अर्ब रुपैयाँ निकासा गरेपछि कम्पनीहरुले पहिलो चरणको दाबी भुक्तानी शुरु गरेका हुन् ।

पहिलो चरणमा कम्पनीहरुले व्यक्तिगत बीमा दाबीको मात्रै भुक्तानी गर्न शुरु गरेका थिए । नेपाल बीमक संघले पहिलो चरणमा व्यक्तिगत १५ हजार ९४८ बीमा दाबी बापत एक अर्ब ३५ करोड २३ लाख रुपैयाँ वितरण गर्ने भनेको थियो । दाबी पोलिसीमध्ये दुई हजार ७४९ नै दाबी अस्वीकृति भएका छन् ।

निर्जीवन बीमा कम्पनीहरुले गत मंसिर १३ गते देखि पहिलो चरणको कोरोना दाबी भुक्तानी गर्न शुरु गरेका थिए ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।