जीवन बीमा कम्पनीले लघु बीमाबाट जेठमा गरे पौने १७ करोडको कारोबार

जीवन बीमा कम्पनीहरुले चालु आर्थिक वर्षको जेठ महिनामा १६ करोड ७६ लाख ५४ हजार बराबरको व्यवसाय लघु बीमा मार्फत गरेका छन् ।

वैशाख महिनामा १६ करोड ७९ लाख २५ हजार व्यवसाय गरेका कम्पनीहरुको व्यवसाय जेठ महिनामा २७ लाख १० हजारले घटेको हो ।

नेपाल बीमा प्राधिकरणले सार्वजनिक गरेको तथ्यांक अनुसार चालु आवको जेठ महिनासम्ममा कुल २ अर्ब १३ करोड ९१ लाख बराबरको लघु जीवन बीमा व्यवसाय गरेका छन् । यस अघि वैशाख महिनासम्ममा लघु जीवन बीमा बापत १ अर्ब ९७ करोड १४ लाख बीमा शुल्क संकलन भएको थियो । वैशाख महिनासम्मको तुलनामा जेठमा कुल लघु बीमा शुल्क १६ करोड ७७ लाखले बढेको हो ।

जीवन बीमा कम्पनीहरुले जेठ महिनामा प्रथम लघु बीमा शुल्क मार्फत १५ करोड ९२ लाख ६ हजार संकलन गरेका छन् भने नवीकरण बीमा शुल्क बापत ८४ लाख ४८ हजार संकलन गरेका छन् ।

प्रथम बीमा शुल्कमा सर्वाधिक नेशनल लाइफ इन्स्योरेन्सले गरेको छ । जेठ महिनामा कम्पनीले ६ करोड ३ लाख ६० हजार प्रथम बीमा शुल्क मार्फत संकलन गरेको छ। सिटिजन्स लाइफले ४ करोड ६१ लाख ९७ हजार, सानीमा रिलायन्स लाइफले १ करोड ७० लाख १९ हजार र सूर्य ज्योति लाइफले १ करोड ३१ लाख ९१ हजार बराबरको लघु बीमा व्यवसाय गरेका छन् ।

नवीकरण बीमा शुल्क मार्फत जेठ महिनामा जीवन बीमा कम्पनीहरुले ८४ लाख ४८ हजार संकलन गरेका छन् । चालु आवको जेठ महिनासम्म ४१ लाख ६९ हजार २०६ वटा लघुबीमा पोलिसी सक्रिय रहेका छन् ।

सरकारले न्यून आय भएका मानिसहरुलाई बीमाको दायरामा समेट्न लघु जीवन बीमा पोलिसी सञ्चालनमा ल्याएको छ । हाल १३ जीवन बीमा कम्पनीहरुले लघु जीवन बीमा सञ्चालन गरिरहेका छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।