आयल निगमका पूर्वकार्यकारी निर्देशक खड्कालाई एक वर्ष तीन महिना कैद

नेपाल आयल निगमका पूर्वकार्यकारी निर्देशक गोपाल खड्कालाई गैरकानुनी सम्पत्ति आर्जनको अभियोगमा दोषी ठहर गर्दै विशेष अदालतले एक वर्ष तीन महिना कैद सजाय र १८ करोड रुपैयाँ विगो भराउने आदेश गरेको हो । 

विशेष अदालतले गैरकानुनी सम्पत्ति आर्जन मुद्दामा दोषि ठहर गर्दै उनलाई शुक्रबार सजाय सुनाएको हो। विशेषका अध्यक्ष श्रीकान्त पौडेल तथा सदस्यद्वय शालिग्राम कोइराला र खुसीप्रसाद थारुको इजलासले खड्काको नाममा रहेको घरजग्गा, बैंक मौज्दात, सेयरलगायतका सम्पत्ति जफत हुने आदेश गरेको छ।

गोपालसँगै उनकी श्रीमती शर्मिला खड्कालाई समेत प्रतिवादी बनाइएकोमा शर्मिलाका नाममा रहेको कित्ता नं. १५२२ र १४२३ मा रहेको घरसमेत जफत हुने भएको छ।

यसै मुद्दाकी अर्की प्रतिवादी अमिता लामा सोदेम्बाको नाममा रहेको जग्गासहितका सम्पत्ति र सिजी डेभलपर्स प्रालिकोे सम्पत्ति पनि जफत हुने फैसला भएको छ।

अख्तियार दुरुपयोग अनुसन्धान आयोगले २३ पुस २०७८ मा खड्कामाथि १८ करोड ६६ लाख ५ हजार ६२९ रुपैंया गैरकानुनी रुपमा आर्जन गरेको अभियोग लगाएको थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।