निर्जीवन बीमा कम्पनीले संकलन गरे साढे ४० अर्बमाथि बीमाशुल्क, शिखर पहिलो

निर्जीवन बीमा कम्पनीहरुले गत आर्थिक वर्ष २०८९/८० मा ४० अर्ब ५७ करोड ४५ लाख रुपैयाँ कुल बीमा शुल्क संकलन गरेका छन् । आर्थिक वर्ष २०७९–८० को असार मसान्तसम्ममा कम्पनीहरुले २८ लाख १६ हजार २२४ वटा बीमा पोलिसीहरु बिक्री गरी उक्त बीमा शुल्क संकलन गरेका हुन् ।

नेपाल बीमा प्राधिकरणका अनुसार निर्जीवन बीमा कम्पनीहरुको बीमा व्यवसाय अघिल्लो वर्षको तुलनामा कुल ३.५९ प्रतिशतले बढेको हो । अघिल्लो आर्थिक वर्ष २०७८-८९ को असार मसान्तसम्ममा बीमा कम्पनीहरुले सञ्चालनमा रहेका २० निर्जीवन बीमा कम्पनीहरुले आर्थिक वर्ष मा कुल ३९ अर्ब १६ करोड ६९ लाख ८९ हजार रुपैयाँ बीमा शुल्क संकलन गरेका थिए । गत आवमा २० निर्जीवन बीमा कम्पनीहरु रहेकोमा एक वर्षको अवधिमा ६ बीमा कम्पनी मर्जरका कारण घटेका हुन् ।

तथ्याङ्क अनुसार शिखर इन्स्योरेन्स कम्पनीले सबैभन्दा धेरै बीमशुल्क संकलन गरेको छ । कम्पनीले ५ अर्ब ५२ करोड २१ लाख ६५ हजार रुपैयाँ कुल बीमा शुल्क संकलन गरेको छ । यस्तै सगरमाथा लुम्बिनी इन्स्योरेन्स कम्पनीले ४ अर्ब ५५ करोड २३ लाख २२ हजार रुपैयाँ बीमाशुल्क संकलन गरेको छ । तेस्रो ठूला बीमाशुल्क संकलन गरेको सिद्धार्थ प्रिमियर इन्स्योरेन्स कम्पनीले ४ अर्ब ५१ करोड ६६ लाख ४२ हजार रुपैयाँ बीमा शुल्क संकलन गरेको छ ।

त्यस्तै यूनाइटेड अजोड इन्स्योरेन्स कम्पनीले ३ अर्ब ४२ करोड ७३ लाख ७० हजार रुपैयाँ बीमा शुल्क संकलन गरेको छ । आइजीआई प्रुडेन्सियल इन्स्योरेन्स कम्पनीले ३ अर्ब ३९ करोड ९५ हजार रुपैयाँ बीमा शुल्क संकलन गरेको छ । यस्तै हिमालयन एभरेष्ट इन्स्योरेन्सले ३ अर्ब ३५ करोड ३९ लाख १७ हजार रुपैयाँ कुल बीमा शुल्क संकलन गरेको छ ।

यस्तै नेको इन्स्योरेन्सले २ अर्ब ९२ करोड २४ लाख २ हजार रुपैयाँ, एनएलजी इन्स्योरेन्स कम्पनीले २ अर्ब ४० करोड ५४ लाख ८६ हजार रुपैयाँ बीमा शुल्क संकलन गरेको छ । सरकारी स्वामित्वको राष्ट्रिय बीमा कम्पनीले २ अर्ब ३७ करोड २३ लाख २६ हजार रुपैयाँ, सानिमा जीआईसी इन्स्योरेन्सले २ अर्ब ३२ करोड ४४ लाख ८९ हजार, प्रभु इन्स्योरेन्सले १ अर्ब ६५ करोड ८७ लाख ७७ हजार रुपैयाँ, नेपाल इन्स्योरेन्सले १ अर्ब ५८ करोड ५८ लाख ८६ हजार रुपैयाँ, ओरियण्टल इन्स्योरेन्सले १ अर्ब ५२ करोड ५० लाख २० हजार रुपैयाँ र नेशनल इन्स्योरेन्स कम्पनीले १ अर्ब १ करोड ८३ लाख ३१ हजार रुपैयाँ कुल बीमा शुल्क संकलन गरेको बीमा प्राधिकरणले जनाएको छ ।

मर्जरले सिनर्जी, नेको दोस्रोबाट सातौं स्थानमा झर्यो

नेपाल बीमा प्राधिकरणका अनुसार मर्जरमा गएका कम्पनीहरुले आफ्नो व्यवसायलाई तीब्रता दिएका छन् । यसले अन्य प्रतिप्रस्र्धी कम्पनीलाई पछाडि पार्दै मर्जरमा गएका कम्पनीले आफूलाई अपग्रेड गरेका हुन् ।

मर्जरमा नगएपनि शिखर इन्स्योरेन्सले बीमाशुल्क संकलनमा पहिलो नम्बरमा नै आफूलाई सुरक्षित गर्दा अघिल्लो आवमा दोस्रो स्थानमा रहेको नेको इन्स्योरेन्स गत आवमा सातौं स्थानमा झरेको छ । नेकोलाई सगरमाथा लुम्बिनी, सिद्धार्थ प्रिमियर, यूनाइटेड अजोड, आइजीआई प्रुडेन्सियल र हिमालयन एभरेष्ट इन्स्योरेन्सले उछिनेका हुन् ।

दुई कम्पनी एकीकृत हुँदा कम्पनीको सञ्जाल र पुहँच मजबुद हुँदा बीमाशुल्क संकलनमा समेत अब्बल देखिएका हुन् । मर्जरमा नगएका कम्पनीहरु बीमाशुल्क संकलनको हिसाबले पछि परेका छन् । मर्जर गरेपनि सानिमा जीआईसी इन्स्योरेन्स भने दशैं स्थानमा रहेको छ । विदेशी स्वामित्वमा सञ्चालिच भई नेप्सेमा सूचीकृत नरहेका दी ओरियण्टल र नेशनल इन्स्योरेन्स अन्तिममा रहेका छन् ।

तीन कम्पनीको बीमाशुल्क घट्यो

प्राधिकरणको तथ्याङ्क अनुसार तीन कम्पनीको बीमाशुल्क भने घटेको छ । समीक्षा अवधिमा राष्ट्रिय बीमा कम्पनी, सिद्धार्थ प्रिमियर इन्स्योरेन्स, सगरमाथा लुम्बिनी इन्स्योरेन्सको बीमाशुल्क भने अघिल्लो आवको तुलनामा घटेको हो । राष्ट्रिय बीमा कम्पनीको १०.३८ प्रतिशत, सिद्धार्थ प्रिमियर इन्स्योरेन्सको ५.०८ र सगरमाथा लुम्बिनीको बीमाशुल्क २.९५ प्रतिशतले घटेको हो ।

एघारले बीमाशुल्क बढाए, प्रभु इन्स्योरेन्सको सर्वाधिक

गत आवमा प्रभु इन्स्योरेन्सले सर्वाधिक २२.२० प्रतिशतले वृद्धि गरेको छ । सानिमा जीआईसी १९.४८ प्रतिशत, नेशनल इन्स्योरेन्स १२.३२, शिखर इन्स्योरेन्स १०.३२ प्रतिशतले बढेको छ ।

यस्तै आईजीआई प्रुडेन्सियलको ९.१४ प्रतिशत, यूनाइटेड अजोड ६.५३, दी ओरियण्टल इन्स्योरेन्स ५.७७, नेको इन्स्योरेन्स २.४०, हिमालयन एभरेष्ट इन्स्योरेन्स २.११, एनएलजी इन्स्योरेन्स १.४५ प्रतिशतले बढेको छ । समीक्षा अवधिमा नेपाल इन्स्योरेन्सको बीमाशुल्क सबैभन्दा कम ०.३७ प्रतिशतले बढेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।