वाणिज्य बैंकहरूको नाफा २५% ले बढ्यो, ७० अर्ब १७ करोड खुद नाफा आर्जन

वाणिज्य बैंकहरुको खुद नाफा २४.९३ प्रतिशतले बढेको छ । सञ्चालनमा रहेका २० वाणिज्य बैंकहरुले गत आव २०७९।८० मा कुल ७० अर्ब १७ करोड ५८ लाख १८ हजार रुपैयाँ खुद नाफा आर्जन गरेका छन् ।

अघिल्लो आर्थिक वर्षको परिष्कृत वित्तीय विवरणको तुलनामा गत आवको अपरिष्कृत वित्तीय विवरणको तुलना गर्दा यस्तो देखिएको हो । यसबीचमा ६ वटा वाणिज्य बैंक एक आपसमा मर्जर भई विलय भएको अवस्था छ । विलय भएका बैंकहरुको नाफा समेत विलय गर्ने बैंकमा जोडिँदा नाफाको बढोत्तरी धेरै देखिएको हो ।

अघिल्लो आव २०७८/७९ को परिष्कृत वित्तीय विवरण अनुसार २० वाणिज्य बैंकहरुले ५७ अर्ब १७ करोड २३ लाख ८२ हजार रुपैयाँ खुद नाफा आर्जन गरेका थिए ।

दुई वाणिज्य बैंकको नाफा ७ अर्ब माथि, थप ३ ले पनि कमाए ४ अर्बमाथि

गत आर्थिक वर्षको अन्त्यसम्ममा नबिल बैंक र ग्लोबल आईएमई बैंकले ७ अर्बभन्दा धेरै खुद नाफा आर्जन गरेका छन् । सबैभन्दा धेरै नाफा आर्जन गरेको नबिल बैंकले ७ अर्ब ५२ करोड माथि खुद नाफा आर्जन गर्दा ग्लोबल आईएमई बैंकले पनि ७ अर्ब २५ करोड रुपैयाँ माथि नाफा कमाएको हो । ग्लोबलले बिओकेलाई गाभेर गत आवमा एकीकृत कारोबार थालेको थियो ।

यसैगरी गत आवमा राष्ट्रिय वाणिज्य बैंकले ४ अर्ब ९१ करोड, एनआईसी एशिया बैंकले ४ अर्ब ६५ करोड र मेगा बै.कसँग विग मर्जर गरेको नेपाल इन्भेष्टमेन्ट मेगा बैंकले ४ अर्ब ६५ करोड रुपैयाँ भन्दा धेरै खुद नाफा कमाएको छ ।

थप ७ बैंकहरुको नाफा ३ अर्बभन्दा धेरै ४ अर्बभन्दा कम छ । गत आवमा स्ट्याण्डर्ड चार्टर्ड बैंक, नेपाल बैंक, एनएमबि बैंक, एभरेष्ट, सिभिल बैंकसँग विग मर्जर गरेको हिमालयन बैंक, सिद्धार्थ र कृषि विकास बैंकले तीन अर्बभन्दा धेरै खुद नाफा आर्जन गरेका हुन् ।

माथिको तालिकामा मर्जरबाट विलय भएका बैंकले अघिल्लो आव २०७८।७९ मा आर्जन गरेको खुद नाफालाई समावेश गरिएको छैन ।

यसैगरी ६ वटा बैंकले २ अर्ब रुपैयाँभन्दा धेरै नाफा कमाउँदा २ बैंकको नाफा २ अर्बभन्दा कम छ । यस अवधिमा सेञ्चुरी गाभेको प्रभु बैंकले २ अर्ब ८२ करोड, सानिमा बैंक २ अर्ब ६१ करोड, प्राइम २ अर्ब २६ करोड, सनराज् र लक्ष्मी बैंकबीच मर्जर भई बनेको लक्ष्मी सनराइज बैंकले २ अर्ब २६ करोड, नेपाल एसबिआई बैंकको खुद नाफा २ अर्ब २४ करोड र सिटिजन बैंकले २ अर्ब २१ करोड रुपैयाँ बढी खुद नाफा आर्जन गरेको छ । समीक्षा अवधिमा एनसीसीसँग मर्जर भई बनेको कुमारी बैंकले १ अर्ब ९५ करोड नाफा कमाएको छ । गत आवमा माछापुच्छ्रे बैंकले सबैभन्दा कम १ अर्ब ८५ करोड रुपैयाँभन्दा बढी खुद नाफा आर्जन गरेको छ ।

नबिलले बढायो सर्वाधिक नाफा, प्राइम र कुमारीको भने घट्यो

अघिल्लो आवको तुलनामा गत आवमा १८ वटा वाणिज्य बैंकले आफ्नो खुद नाफा बढाउँदा नबल बैंकले सबैभन्दा धेरै वृद्धि गरेको छ यस अवधिमा प्राइम र कुमारी बैंकको खुद नाफा घटेको छ ।

गत आवमा सबैभन्दा धेरै नाफा कमाएको नबिल बैंकले ७६.८६ प्रतिशतले नाफा वृद्धि गरेको हो । दोस्रो ठूलो स्ट्याण्डर्ड चार्टडले ५६.२७ प्रतिशत, लक्ष्मी सनराइज बैंकले ४९.४५, प्रभु बैंकले ४८.५४ र ग्लोबल आइएमई बैंकले ४६.२६ प्रतिशतले खुद नाफा बढाएको छ ।

यसैगरी कृषि विकास बैंकले ३९.२५ प्रतिशत, हिमालयन बैंकले ३७.९६, एभरेष्ट बैंक ३६.८५ र नेपाल एसबिआई बैंकले ३६.८३ प्रतिशतले नाफा बढाएको छ । अघिल्लो आवको तुलनामा सानिमा बैंकले २५.१३ प्रतिशतले नाफा बढाउँदा नेपाल बैंकले १६.७० प्रतिशत, राष्ट्रिय वाणिज्य बैंकले १४.५४, नेपाल इन्भेष्टमेन्ट मेगा बैंकले १३.१४, सिटिजन बैंकले १०.४१ र एनआईसी एशिया बैंकले १०.३५ प्रतिशतले खुद नाफा बढाएको हो । गत आवमा सिद्धार्थ बैंकले ९.९१ प्रतिशत, माछापुच्छ्रे बैंकले ९.७५, एनएमबि बैंकले ३.६३ प्रतिशतले खुद नाफा वृद्धि गरेको छ ।

एनसीसी बैंकसँग विग मर्जर गरी एकीकृत कारोबार थालेको कुमारी बैंकको खुद नाफा अघिल्लो आवको तुलनामा गत आवमा सर्वाधिक २४.१४ प्रतिशतले घटेको छ भने प्राइम कमर्सियल बैंकको पनि १८.८१ प्रतिशतले नाफा घटेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।