आम्दानीमा आएको ह्रासले टेलिकमको नाफा साढे ६६ करोड घट्यो

सरकारी स्वामित्वमा सञ्चालित देशकै ठूलो दूरसञ्चार प्रदायक संस्था (नेपाल टेलिकम लिमिटेड) को खुद नाफा अघिल्लो आवको तुलनामा गत आवमा ७.८६ प्रतिशत अर्थात ६६ करोड ६२ लाख ७ हजार रुपैयाँले घटेको छ ।

दूरसञ्चार कम्पनीहरुबीचको प्रतिस्पर्धाले बिक्री आम्दानी र सञ्चालन आम्दानी घटेपछि कम्पनीको मुनाफा प्रभावित बनेको हो । टेलिकमले गत आवमा ७ अर्ब ८० करोड ४५ लाख २७ हजार रुपैयाँ खुद नाफा आर्जन गरेको हो । घिल्लो आवमा कम्पनीले ८ अर्ब ४७ करोड ७ लाख ३४ हजार रुपैयाँ खुद नाफा आर्जन गरेको थियो ।

गत आर्थिक वर्षको चौथो त्रैमाससम्मको अपरिष्कृत वित्तीय विवरण अनुसार कम्पनीको बिक्री आम्दानी २.९४ प्रतिशत र अन्य आम्दानी ४५.३४ प्रतिशत घटेको छ । गत आवमा टेलिकमले सेवा बिक्रीबाट ३६ अर्ब ८० करोड ३९ लाख ३१ हजार रुपैयाँ आम्दानी गरेको हो । अघिल्लो आवमा सेवा बिक्रीबाट ३७ अर्ब ९१ करोड ९७ लाख ८९ हजार रुपैयाँ आम्दानी गरेको थियो । यस्तै अन्य आम्दानी २९ करोड ढ२ लाख १९ हजार छ । समीक्षा अवधिमा कम्पनीको वित्तीय आम्दानी भने ३१.४५ प्रतिशत बढेर ७ अर्ब ७६ करोड ५१ लाख २३ हजार रुपैयाँ कायम भएको छ ।

टेलिकमको कुल आम्दानी १.११ प्रतिशत बढेपनि खर्च बढ्दा समग्रमा नाफा भने घट्न पुगेको हो । टेलिकमको कुल नाफा ४४ अर्ब ८६ करोड ८२ लाख ७३ हजार रुपैयाँ छ । यस अवधिमा टेलिकमको सञ्चालन तथा मर्मत खर्च ६.२७ प्रतिशत बढेर ७ अर्ब ५० करोड १२ लाख २० हजार पुगेको छ । यस्तै प्रशासनिक खर्च पनि ११.५१ प्रतिशत बढेर १ अर्ब २५ करोड ७ लाख ५५ हजार रुपैयाँ पुगेको छ । उठ्न बाँकी रकम २ अर्ब ४७ करोड ९६ लाख १५ हजार छ ।

चुक्ता पुँजी १८ अर्ब रुपैयाँ रहेको नेपाल दूरसञ्चार कम्पनीको प्रति सेयर आम्दानी (इपीएस) ४३ रुपैयाँ ३६ पैसा छ । नाफा घटेसँगै कम्पनीको प्रति सेयर आम्दानी पनि अघिल्लो आवको तुलनामा ३ रुपैयाँ ७० पैसा घटेको हो । कम्पनीको जगेडा कोषमा ७५ अर्ब ८२ करोड ८१ लाख ९३ हजार रुपैयाँ सञ्चित छ । जुन अघिल्लो आवको तुलनामा १ अर्ब ४४ रुपैयाँ कम हो । असार मसान्तसम्म टेलिकमको प्रति सेयर नेटवर्थ ५२१ रुपैयाँ २७ पैसा छ । यस्तै मूल्य आम्दानी अनुपात २०.९२ गुणा छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।