सानिमा बैंकको यस्तो छ १३ वर्षे लाभांश इतिहास

गैर आवासीय नेपालीहरुद्धारा प्रवद्धित सानिमा बैंकले लगानीकर्तालाई तेह्र वर्षमा औषत १४.०५ प्रतिशतका दरले कुल १८२.५९ प्रतिशत लाभांश वितरण गरेको छ ।

बैंकले तेह्र वर्षमध्ये दुई आर्थिक वर्षहरु २०७१/७२ र आव २०७५/७६ मा २० प्रतिशतभन्दा धेरै लाभांश वितरण गरेको छ । यस्तै चार आर्थिक वर्षहरुमा आव २०७७/७८, ०७३/७४, ०७२।७३ र २०७०/७१ मा १५ प्रतिशतभन्दा धेरै तथा पाँच आर्थिक वर्षमा दश प्रतिशतभन्दा धेरै पन्ध्र प्रतिशतभन्दा कम प्रतिफल लगानीकर्तालाई वितरण गरेको छ ।

यसैगरी बैंकले गत आव २०७९/८०, ०७८/७९, ०७६/७७,०७४/७५ र ०६९/७० मा बैंकले दश देखि पन्ध्र प्रतिशतको बीचमा लाभांश वितरण गरेको थियो । यस्तै बैंकले दुई आर्थिक वर्षहरु २०६७/६८ र २०६८/७९ मा सिंगल डिजिटमा लाभांश वितरण गरेको छ ।

गत आर्थिक वर्षको चौथो त्रैमाससम्म सानिमा बैंकको चुक्ता पुँजी १२ अर्ब ४६ करोड १ लाख १५ हजार ५९ रुपैयाँ पुगेको छ । यस्तै बैंकको सेयरधनी कोषमा २ अर्ब २० करोड ९६ लाख र जगेडा कोषमा ४ अर्ब ७० करोड ७२ लाख सञ्चित छ । गत आवमा बैंकले १ खर्ब ७५ अर्ब २७ करोड रुपैयाँ निक्षेप संकलन गरी १ खर्ब ४५ अर्ब ४० करोड रुपैयाँ कर्जा परिचालन गरेको छ ।