कर्जा लगानी साढे १६ अर्बले घट्दा पनि बैंक वित्तीय संस्थाको नाफा १० अर्ब

चालु आर्थिक वर्षको साउन महीनामा बैंक तथा वित्तीय संस्थाले साढे १६ अर्ब रुपैयाँ कर्जा घट्दा पनि १० अर्ब रुपैयाँ भन्दा धेरै नाफा कमाएका छन् ।

आर्थिक गतिविधि सुस्त भएसँगै कर्जाको मागमा सुधार नभएको मात्र नभई पुरानो कर्जा समेत घटेको अवस्थामा पनि बैंक वित्तीय संस्थाले खुद नाफा भने बढाएका हुन् । चालु आर्थिक वर्षको साउन महीनामा बैंक तथा वित्तीय संस्थाले १० अर्ब २२ करोड ५० लाख रुपैयाँ खुद नाफा गरेका छन् । यो नाफा गत आवको सोही अवधिको तुलनामा करिब ३ प्रतिशतले धेरै हो । गत आवको सोही अवधिमा बैंक तथा वित्तीय संस्थाले ९ अर्ब ९३ करोड ५० लाख रुपैयाँ खुद नाफा गरेका थिए ।

नेपाल राष्ट्र बैंकका अनुसार चालु आवको साउनमा बैंक वित्तीय संस्थाबाट १६ अर्ब ६७ करोड ३० लाख रुपैयाँले कर्जा घटेको छ । गत आर्थिक वर्षको अन्तिममा ४८ खर्ब ७३ अर्ब ८० करोड कर्जा लगानी रहेकोमा चालु आर्थिक वर्षको साउन महिनामा घटेर ४८ खर्ब ५७ अर्ब १३ करोड रुपैयाँमा झरेको छ ।

कोरोना महामारीको असर तथा आर्थिक मन्दीका कारण बैंक तथा वित्तीय संस्थाले कर्जा असुलीमा विषेश ध्यान दिएका थिए । गत आवमा उच्च ब्याजदर तथा सुस्त आर्थिक गतिविधिका कारण कर्जाको माग बढ्न नसकेको हुनाले कर्जाको ‘डिफल्ट रेट’ पनि बढको थियो । खराब कर्जा कम गर्न बैंकहरुले चालु आर्थिक वर्षको साउनमा पनि असुलीलाई ध्यान दिँदा नाफा बढ्यो भने कर्जा लगानी घटेको हो ।

गत आर्थिक वर्षको साउन महिनामा भने बैंक वित्तीय संस्थाको कर्जा लगानी बढेको थियो । गत आवको साउन महीनामा बैंक तथा वित्तीय संस्थाले ९ अर्ब ९४ करोड ७० लाख रुपैयाँ कर्जा लगानी बढाएका थिए । गत आवको साउन अन्तिमसम्ममा बैंक तथा वित्तीय संस्थाको कुल कर्जा ४७ खर्ब १८ अर्ब ९९ करोड रुपैयाँ रहेको थियो ।

चालु आर्थिक वर्षको साउन महिनामा वाणिज्य बैंकहरुको खुद नाफा ८ अर्ब ५२ करोड ५० लाख रुपैयाँ रहेको छ । यो नाफा लगत आवको सोही अवधिको तुलनामा ५.६७ प्रतिशतले थोरै हो । गत आवको साउन महिनामा वाणिज्य बैंकहरुले मात्रै ९ अर्ब ३ करोड ८० लाख रुपैयाँ खुद नाफा गरेको थिए । गत आवको साउन महिनामा सञ्चालनमा रहेका वाणिज्य बैंकको संख्या २६ रहेको थियो भने चालु आवमा उक्त संख्या घटेर २० वटामा झरेको छ ।

त्यसैगरी चालु आवको पहिलो महिनामा सञ्चालनमा रहेका १७ विकास बैंकको खुद नाफा ९४ करोड ८० लाख रुपैयाँ रहेको छ । यो नाफा गत आवको सोही अवधिको तुलनामा २६.९० प्रतिशतले धेरै हो । गत अवाको पहिलो महिनामा ती विकास बैंकहरुको खुद नाफा ७४ करोड ७० लाख रुपैयाँ थियो ।

चालु आर्थिक वर्षको साउन महीनामा सञ्चालनमा रहेका १७ फानान्स कम्पनीको खुद नाफा ७५ करोड २० लाख रपैयाँ रहेको छ । यो नाफा गत आवको सोही अवधिको तुलनामा ४०४.६९ प्रतिशतले धेरै हो । गत आवको साउन महिनामा फाइनान्स कम्पनीहरुको १४ करोड ९० लाख रुपैयाँ मात्र खुद नाफा गरेका थिए ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।